Jeńildetilgen avtonesıeleýge taǵy 10 mlrd. teńge bólinedi - B.Jámishev
ASTANA. QazAqparat - Qarasha aıynda jeńildetilgen avtonesıeleýge taǵy 10 mlrd. teńge bólinedi dep kútilýde. Bul týraly búgin Ortalyq kommýnıkatsııalar qyzmetinde ótken baspasóz máslıhatynda Qazaqstannyń damý bankiniń basshysy Bolat Jámishev málim etti.
Onyń aıtýynsha, jyl basynda bólingen birinshi transh aıasyndaǵy 15 mlrd. teńgeniń 12,5 mlrd. teńgesi jumsalǵan.
«Jeńildetilgen avtonesıeleýge bólingen qarajattyń 77 paıyzy ıgerildi. Eń úlken tanymaldylyqqa «Hıýndaı» men «Kıa» kólikteri ıe bolyp otyr. «Shkoda» úshinshi orynda. «Azııa Avto» kompanııasynyń lımıti tolyǵymen ıgerilgen, «Saryarqa avtoónerkásip» nátıjeleri de nashar emes, «Agromash holdıng» kompanııasynyń nátıjeleri sál nasharlaý. «Agromash holdıng» týraly az-kem túsindire keteıin, olar «Pejo» kólikterin satyp alý boıynsha bizdiń akredıtıvimizdi alý úshin banktiń talaptaryn oryndaýy tıis bolǵan. Olar jaqynda ǵana osy talaptardy oryndap shyqty. Biz akredıtıv ashtyq jáne qazirgi ýaqytta «Pejo» kólikterine de jeńildetilgen nesıe alý múmkindigi týdy. Jyl sońyna deıin «Agromash holdıng» joǵaryda atalǵan eki kompanııany qýyp jetedi dep sanaımyn», - dedi B.Jámishev.
Onyń aıtýynsha, jeńildetilgen nesıe baǵdarlamasynyń ekinshi transhy boıynsha barlyǵy 10 mlrd. teńge bólinedi. «Úkimettiń Qaýlysy bir aıdyń kóleminde qabyldanady dep úmittenemiz. Transh qandaı kásiporynǵa bólinetinin aldyn ala aıta almaımyn. Birinshi transhtyń ıgerilý nátıjesi qaperge alynatynyn aıtamyz. Menińshe, qarashanyń ekinshi jartysynda ekinshi transh bólinip, osy baǵdarlamany jalǵastyrý múmkin bolady dep oılaımyn», - dedi B.Jámishev.
«QDB Lızıng» boıynsha kólikterge 620 mln. teńgege 8 lızıngtik kelisim jasaldy. «QDB Lızıng» negizinen arnaıy avtokólikterge beriledi.
