Jeńildetilgen avtonesıege Úkimetten qosymsha qarajat suraýymyz múmkin – Rınat Gapparov
«Biz Úkimetke mynany usynamyz. jeńildetilgen avtonesıege degen el ishindegi suranys qazir bólinip otyrǵan somadan joǵary ekenin jetkizemiz. Esińizde bolsa, byltyr 100 mlrd teńge bólingen bolatyn. Qazir sol aqsha revolerlik júıe boıynsha ıgerilip jatyr», - dedi ol.
Sondaı-aq, ol búgingi ótinim qabyldaý sharasynyń qorytyndysy boıynsha Úkimetke esep beretinderin atap ótti.
«Ótinimdi jazbasha berýimiz de múmkin. Búgingi sharanyń qorytyndysyn jasap, statıstıkasyn ázirleımiz. Úkimetke esep beretin shyǵarmyz. Sol jerde 125 myńnan astam adam avtonesıe resimdeýge nıet bildirgenin aıtamyz. Aqsha suraıtyn bolsaq, ony qandaı da bir derektermen dáleldeýimiz kerek qoı. Sol úshin statıstıkany qalyptastyramyz. 125 myń adamnyń qalaýyn túgel oryndaý úshin ár ótinimge 10 mln teńge degende, keminde 1 trln 250 mlrd teńge qajet. Bıýdjettiń ondaı múmkindigi bar ma? Bálkim ishinara qanaǵattandyrý qajet bolar. Búgingi brıfıngide keıbir áriptesterińiz jappaı qazaqstandyqtardy qatystyrmaı, jekelegen sanattarǵa jeńildetilgen avtonesıe berý kerek degen usynys aıtyp qaldy. Ol týraly da oılanýǵa bolatyn sııaqty. Mysaly, áleýmettik turǵyda az qamtylǵandar men tuńǵysh ret kólikti bolǵysy keletinder degen sııaqty sanattarǵa nesıe berý jaǵyn oılastyrýǵa bolady», - dedi Rınat Gapparov.
Osyǵan deıin avtokredıt ótinimin búgin tirkep úlgergender 60 kúnniń ishinde kólik alatyny habarlandy.