Jeńildetilgen avtonesıege beriletin avtobýstardy eń aldymen qaı óńirler alady

ASTANA. QazAqparat – Indýstrııa jáne ınfraqurylymdyq damý mınıstri Marat Qarabaev jeńildetilgen avtonesıe baǵdarlamasy arqyly avtobýs satyp alý jumysynyń barysymen tanystyrdy, dep habarlaıdy QazAqparat tilshisi.

«Aı saıyn revolverlik negizde shamamen 1 mlrd teńge qaıtarylady, tıisinshe jylyna 12 mlrd teńge. 12 mlrd-qa 1200 kólik nemese 1500 avtobýs satyp alýǵa bolady. Jeńildetilgen nesıeleý arqyly qoǵamdyq kólikke degen qajettilikti qanaǵattandyrýǵa basymdyq beremiz. Men muny durys sheshim dep sanaımyn. Avtobýs satyp alýda revolver mehanızmi jumys isteıdi. Jalpy bizde 10 545 avtobýs bar», - dedi Marat Qarabaev Úkimet otyrysynan keıin tilshilerdiń suraǵyna jaýap berip.

Mınıstrdiń dereginshe, elimizdegi qoǵamdyq kóliktiń 46% tozǵan.

«Jyl saıyn avtobýs parkindegi avtobýstardy shamamen 1500-den 2000 deıin jańartý qajet. Avtobýstar óńirlerden kelip túsken ótinim boıynsha taratylady. Alǵashqy avtobýstardy Qyzylorda oblysy, Astana jáne Almaty qalasy alady. Shamamen eki aı shamasynda avtobýstar berile bastaıdy», - deıdi ol.