Jeńil ónerkásiptiń 60%-dan astamy toqyma óndirisine tıesili
NUR-SULTAN. QazAqparat - Jeńil ónerkásiptegi toqyma óndirisiniń úlesi 55,5%-dan 60,1%-ǵa artqan, dep habarlaıdy QazAqparat energyprom.kz saıtyna silteme jasap.
Toqyma buıymdary ishinde maqta-mata shyǵarý 3,5%-ke (2020 jyldyń qańtar-sáýirinde 8,1 mln sharshy metrge deıin) jáne úı sharýashylyǵyna qajetti daıyn toqyma buıymdary 5,7%-ke (7,4 mln danaǵa, sonyń ishinde tósek-oryn jabdyǵy – 2,5 mln danaǵa, bir jylda +22,1%-ke artqan) ósken. 2020 jyldyń qańtar-sáýirinde toqylmaǵan materıaldar men buıymdar shyǵarý 1,9 mln sharshy metrdi quraǵan.
Mata shyǵarý úsh óńirde damyǵan: Pavlodar (14,4 mln sharshy metr) jáne Qostanaı (0,4 mln sharshy metr) oblystarynda, sondaı-aq Shymkentte (8,6 mln sharshy metr). Baıpaq pen juqa kıizden jasalǵan aıaq-kıim Aqmola (15,5 myń jup) men Shyǵys Qazaqstan oblystarynda (4,6 myń jup) óndiriledi. Maqta tolyǵymen Túrkistan oblysynda shyǵarylady.
Toqyma buıymdaryn óndirý kólemi 2020 jyldyń qańtar-sáýirinde 23,4 mlrd tg quraǵan. Bul ótken jylmen salystyrǵanda 20,5%-ǵa kóp. Jeńil ónerkásiptegi toqyma úlesi 55,5%-dan 60,1%-ǵa artqan.
Eske salaıyq, maýsymnyń ekinshi jeksenbisinde jeńil ónerkásip salasynyń qyzmetkerleri kásibı merekelerin atap ótti. Qazaqstan Respýblıkasy Indýstrııa jáne ınfraqurylymdyq damý mınıstrligi qazirgi ýaqytta jeńil ónerkásip salasy memleket tarapynan asa mán berilip otyrǵan basym baǵyttardyń biri ekenin habarlady.
