Jeńil ónerkásipti damytý úshin júıeli sharalar qabyldanýda - Beıbit Atamqulov
«Bıylǵy 1-toqsanda mınıstrlik jetekshilik etetin barlyq salalarda oń serpin baıqalady. Esepti kezeńde ónerkásip óndirisiniń kólemi 5,8, onyń ishinde taý-ken ónerkásibi 5, óńdeýshi ónerkásip 8,8 paıyzǵa ulǵaıdy. Óńirlerdiń barlyǵynda derlik ósim baıqalýda. Taý-ken óndirý sektorynda tústi ken óndirisiniń kólemi 8,1 paıyzǵa ulǵaıdy. Negizinen quramynda altyn bar ken óndirý kólemi artty», - dedi ol.
Mınıstr dereginshe, temir kenin óndirý 22,2 paıyzǵa ulǵaıdy. Kómir men lıgnıt óndirý kólemi 100,2 paıyzdy qurady. Óńdeý ónerkásibinde ósim 8,8 paıyz boldy. Ósim qara jáne tústi metallýrgııa, mashına jasaý, jeńil ónerkásip, farmatsevtıka ónerkásibi, qurylys materıaldary óndirisi salalarynda baıqaldy. Qara metallýrgııada óndiris kólemi 101,5 paıyzdy qurady.
«Elimizde, sondaı-aq álemniń kóptegen elderinde koronavırýstyq ınfektsııa pandemııasynyń taralýyna, sondaı-aq metalldar naryǵy konıýnktýrasynyń qalyptasqan ahýalyna jáne eksporttyq áleýetti qaıta bólýge baılanysty «ArselorMıttal Temirtaý» men ERG kompanııalar toby óndiristi turaqtandyrýdy jáne óndiriletin ónimdi úzdiksiz satýdy qamtamasyz etý maqsatynda balamaly ótkizý naryqtaryn qarastyryp jatyr», - dedi Beıbit Atamqulov.
Mashına jasaý salasynda óndiris kólemi 30,4 paıyzǵa ósti. Avtokólik quraldary, treılerler jáne jartylaı tirkemeler 69,5 paıyzǵa, basqa sanattarǵa engizilmegen mashınalar men jabdyqtar 20,7 paıyzǵa elektr jabdyqtary 17,8 paıyzǵa, ózge de kólik quraldaryn jasaý 53,6 paıyzǵa, mashınalar men jabdyqtardy jóndeý jáne ornatý 6,2 paıyzǵa, kompıýterler jasaý 9,6paıyzǵa ulǵaıdy.
Sondaı-aq, onyń derekterine sáıkes, farmatsevtıka ónerkásibinde óndiris kólemi 32,2 paıyzǵa ósti. Jeńil ónerkásipte jalpy óndiris 14,2 paıyzǵa artty. Ol toqyma buıymdary óndirisiniń 12,3, bylǵary jáne oǵan jatatyn ónimderdiń 18,9, kıim óndirisiniń 14,7 paıyzǵa ulǵaıýyna baılanysty boldy.
«Qazirgi ýaqytta «Qarapaıym zattar ekonomıkasy» baǵdarlamasy aıasynda salanyń damýy boıynsha birqatar normatıvtik aktiler men júıeli sharalar qabyldanýda», - dedi mınıstr.
