Jeńil kólikter «Astana-Býrabaı» avtobanymen tegin qatynaýy múmkin
STANA. Maýsymnyń 2-si. QazAqparat /Marlan Jıembaı/ - Jeńil kólikter «Astana-Býrabaı» avtobanymen tegin qatynaýy múmkin. Bul týraly búgin QR Kólik jáne kommýnıkatsııa mınıstri Ábilǵazy Qusaıynov BNews.kz portalynda «Batys Eýropa -Batys Qytaı» jobasynyń júzege asyrylý barysy» taqyrybynda ótken on-laın konferentsııa barysynda málim etti.
«Bizdiń baǵamdaýymyzsha, «Astana-Býrabaı» joly jeńil avtokólikter úshin 1 shaqyrymyna 5 teńge, al júk kólikterine 10 teńge kóleminde aqyly bolýy múmkin. Bul birinshi nusqasy. Sonymen qatar basqa nusqaǵa sáıkes jeńil kólikter úshin tegin bolýy qarastyrylǵan jáne júk kólikteri men avtobýstarǵa baǵa sál joǵary bolýy yqtımal. Óıtkeni olar kommertsııalyq reısterdi oryndaıdy», deıdi mınıstr.
Degenmen osy eki nusqanyń da QR Kólik jáne kommýnıkatsııa mınıstrli tarapynan qaralyp jatqandyǵyn atap ótken Á.Qusaıynov aǵymdaǵy jyly avtojoldy basqarý jáne baqylaý elektrondyq ıntellektýaldyq júıesin oryndaý boıynsha konkýrstyq protsedýralar, al keler jyly arnaıy qurylǵylardy ornatý sharalary ótetinin aıtty.
Atalǵan joldy jyl boıy kútip ustaý Kólik jáne kommýnıkatsııa mınıstrliginiń moınynda ekendigin málim etken mınıstr únemi bıýdjetten qarjy alý múmkin emestigin, bul oraıda osy joldyń aqyly bolǵandyǵy durys degen pikirin alǵa tartty. Avtobandy jyl boıy kútip ustaý úshin bıýdjetten 1 mlrd. teńge jumsalady.
Mınıstrdiń atap ótýinshe, bul jol qaýipsiz, jaıly, sonymen qatar onda oıyqtardyń, shuńqyrlardyń bolmaýynan kóliktiń buzylýyna jol berilmeıdi. Saǵatyna 140 shaqyrym jyldamdyqpen júrýge múmkindik bar ári bul benzındi únemdeýge septigin tıgizedi.
Qazirgi ýaqytta búkil álemde aqyly joldardyń bar ekendigin aıtqan Á.Qusaıynov «biz aqyly joldardy paıdalanatyn 20 elge saraptama jasadyq. Qazaqstan usynyp otyrǵan stavka olarmen salystyrǵanda óte tómen», dedi.
