Jeńil kólikpen soqtyǵysqan «BTR» Qarýly Kúshterge tıesili emes – Qorǵanys mınıstrligi
NUR-SULTAN. QazAqparat – Nur-Sultan-Qaraǵandy tas jolynda jeńil avtokólikpen soqtyǵysqan brondy tasymaldaýshy tehnıka Qorǵanys mınıstrligine tıesili emes. Vedomstvonyń baspasóz qyzmeti osyndaı habar taratty, dep habarlaıdy QazAqparat tilshisi.
Buǵan deıin Nur-Sultan qalasynyń Polıtsııa departamenti bergen túsinikteme boıynsha, oqıǵa 1 qyrkúıekte bolǵan. Saǵat 07.35-te «Nissan Almera» markaly avtokóligin tizgindegen 46 jastaǵy júrgizýshi «Nur-Sultan-Qaraǵandy» tasjolymen Armandastar kóshesiniń qıylysynda solǵa burylǵan kezde dabyl shamdary iske qosylǵan jáne arnaıy dybys sıgnaly bar patrýldik avtokólikke ilesip kele jatqan «BTR 82-A» kóligine jol bermeı, saldarynan ekeýi soqtyǵysqan.
«Jol-kólik oqıǵasy saldarynan zardap shekkender joq. «Nissan Almera» avtokóliginiń júrgizýshisine qatysty Ákimshilik quqyq buzý týraly kodekstiń 610-babynyń 1-bóligi boıynsha ákimshilik is qozǵaldy. Materıal Nur-Sultan qalasyndaǵy mamandandyrylǵan aýdanaralyq sotyna joldandy. Polıtsııa departamenti dabyl shamdary iske qosylǵan jáne arnaıy dybystyq sıgnaly bar kólik quraldary jaqyndaǵan kezde ózge kólikter jol berý kerektigin eskertedi», - dep jazady departamenttiń baspasóz qyzmeti.
Ázirge apatqa túsken brondy tasymaldaýshy tehnıkanyń qaı vedomstvoǵa tıesili ekeni belgisiz. Qorǵanys mınıstrligi onyń Qarýly Kúshterdiń bazasynda tirkelmegenin málim etti.
«Nur-Sultan qalasynda «Nissan Almera» avtokóligi men BTR-dyń soqtyǵysýyna qatysty BAQ-qa jáne áleýmettik jelige taralǵan aqparatqa baılanysty Qorǵanys mınıstrligi jol-kólik oqıǵasyna túsken brondy transporterdiń Qarýly Kúshterge tıesili emestigin habarlaıdy», - delingen mınıstrltiktiń málimetinde.
