Jeńil avtokóliktiń shetelden zańdy ákelingenin qalaı bilýge bolady
ASTANA. QazAqparat - Jeńil avtokólikterdiń shet elderden zańdy nemese zańsyz ákelingenin memlekettik kirister organdaryna habarlasyp, bilýge bolady. Bul jaıly QR Qarjy mınıstrliginiń Memlekettik kirister komıtetinen málim etildi, dep habarlaıdy QazAqparat tilshisi.
«Qazir qazaqstandyqtar Armenııa men Qyrǵyzstannan jeńil avtokólik ákelýge qumar. Osyǵan baılanysty, Qyrǵyzstanda 2014 jyldyń 1 qańtardan bastap 2020 jylǵy 1 qańtarǵa deıingi kezeńde, Armenııada 2014 jylǵy 10 qazannan bastap 2020 jylǵy 1 qańtarǵa deıingi kezeńde rásimdelgen avtokólikter sheteldik taýar bolyp tabylatynyn nazaryńyzǵa jetkizemiz. Avtokólikterdi Qazaqstan Respýblıkasyna ákelý kezinde resimdeý jáne kedendik tólemderdi tóleý kerek», - delingen komıtettiń habarlamasynda.
2014 jyldyń 1 qańtaryna deıin Qyrǵyzstanda jáne 2014 jyldyń 10 qazanyna deıin Armenııada rásimdelgen avtokólikterdi Qazaqstanǵa shekteýsiz ákelýge bolady.
«Avtokólikterdi satyp alý kezinde, azamattarǵa aýmaqtyq memlekettik kirister organdaryna nemese Memlekettik kirister komıtetiniń 8-800-080-6452, 70-14-81, 71-86-18 nómirlerine habarlasyp, avtokólikterdiń zańdy ákelingenin jáne kedendik tazartýdan ótkendigin tekserýge keńes beremiz», - dep habarlanady QR QM Memlekettik kirister komıtetinen.
Eske sala ketsek, osydan bir apta buryn Parlament Senatynyń jalpy otyrysynda bir top depýtat sońǵy kezde elimiz aýmaǵyna Reseı, Armenııa, Qyrǵyzstan elderinen kóptep jetkizilip jatqan eski kólikterge qatysty máseleni kótergen bolatyn.
«Depýtattyq saýalǵa Eýrazııalyq ekonomıkalyq odaqqa múshe elderden satyp ákelinip jatqan ábden tozyǵy jetken eski kólikter sebepshi boldy. Máselen, Batys Qazaqstan oblysy Reseıdiń birqatar óńirimen shekaralasyp jatqany belgili. Eki el arasynda saýda-sattyq jyl saıyn artýda. EAEO aýmaǵyndaǵy shekaralardan árli-berli ótý biraz jeńildegennen keıin, alys-beris te, barys-kelis te jaqsara tústi. Sonyń bir aıǵaǵy - sońǵy jyldary Batys Qazaqstan oblysynda tirkelgen avtomobılderdiń sany kúrt ósýde. Búginde oblysta 143 myńnan astam kólik tirkelse, sońǵy bes jylda 43 myńǵa óskeni anyqtaldy. Árıne, bul qýantarlyq jaǵdaı, biraq sol Reseıden satyp ákelinip jatqan eski kólikter esh jerde tirkelmeı, jol erejesin buzýǵa ábden áýestenip ketkeni halyqty jáne quqyq qorǵaý organdaryn ábigerge salýda», - degen depýtattar Úkimet basshysynan Armenııa men Reseıden eski kólikterdi Qazaqstanǵa kirgizbeýdi suraǵan bolatyn.
