Jeńil atletter Jasóspirimder Olımpıadasyna taǵy eki joldama jeńip aldy
ASTANA. QazAqparat - Býenos-Aıreste ótetin Jasóspirimder Olımpıadasyna qatysatyn otandyq jeńil atletterdiń qatary eki sportshyǵa kóbeıdi, dep habarlaıdy QazAqparat tilshisi.
QR UOK-tiniń baspasóz qyzmeti taratqan málimetke súıensek, qyzylordalyq Galına Panasenko men petropavldyq Krıstına Morozova eki joldamany enshiledi.
Eske sala keteıik, azııa aımaqtyq irikteý týrnıri 4-5 shilde kúnderi Bangkokte ótken bolatyn.
Galına Panasenko 2000 metrge tosqaýyldar arqyly júgirýde tórtinshi oryn ıelense, Krıstına Morozova 5 shaqyrymǵa sozylatyn sporttyq júriste tórtikke engen. Bul eki baǵdarlamada eki joldama oınatylǵan bolatyn. Alaıda, halyqaralyq federatsııa tórtinshi oryn ıemdengen qazaqstandyq sportshylarǵa shaqyrtý jiberdi.
Osylaısha, jeńil atletter 6-18 qazan aralyǵynda Argentına astanasynda ótetin jasóspirimder Olımpıadasyna qatysady.
