Jeńil atletter qańtarda Óskemende oqý-jattyǵý ótkizedi
ASTANA. QazAqparat - Jeńil atletıkadan Qazaqstan ulttyq quramasy kezekti oqý-jattyǵý jıynyn 8-21 qańtar aralyǵynda Óskemende ótkizedi, dep habarlaıdy QazAqparat QR Jeńil atletıka federatsııasynyń resmı saıtyna silteme jasap.
Bul jeńil atletter úshin jańa maýsym aldyndaǵy tórtinshi oqý-jattyǵý jıyny bolmaq. Buǵan deıin ulttyq qurama 9-26 qazan, 7-24 qarasha aralyǵynda Túrkııanyń Belek qalasynda jáne 7-23 jeltoqsanda Óskemende daıyndalǵan edi.
Qańtardaǵy oqý-jattyǵý jıynynyń maqsaty - jabyq keshendegi Azııa chempıonatyna daıyndyq júrgizý. Qurlyq birinshiligi 1-3 aqpan aralyǵynda Iran astanasy Tegeran qalasynda ótedi. Al qańtarda elimizde úsh jarys ótedi. Aldymen Qazaqstan kýbogy (10-11 qańtar) odan keıin Qazaqstan chempıonaty (15-17 qańtar) bar. Sońǵysy - Olga Rypakovanyń júldesine arnalǵan halyqaralyq týrnır (20 qańtar). Úsh jarys ta Óskemen qalasynda ótedi.
