Jeńil atletter arasynda Olımpıada oıyndarynyń lıtsenzııalyq aqtyq irikteý týrnıri Almatyda ótedi
ALMATY. 3 mamyr. QazAqparat - Almatyda 30 maýsym men 1 shilde aralyǵynda jeńil atletıkadan «Azııa juldyzdary» dep atalatyn lıtsenzııalyq irekteý jarysy bolady.
Bul jaıly QR Ulttyq olımpıada komıtetiniń vıtse-prezıdenti Pavel Novıkov búgin Almatyda ótken baspasóz máslıhatynda aıtty.
Baıraqty báseke jeńil atletter arasynda Londonda ótetin HHH Jazǵy olımpıada oıyndarynyń joldamasy sarapqa salynatyn aqtyq irikteý týrnıri bolmaq. P. Novıkovtyń aıtýynsha, qazir Qazaqstannyń qorjynynda sporttyń 17 túrinen 80 lıtsentsııa bar. Búgingi tańda 15 sport túrinen irikteý syndary aıaqtaldy. Endi elimizdiń sportshylary Olımpıada baǵdarlamasyna kirgen sporttyń ózge 13 túrinen ǵana joldamalarǵa talasa alady.
«Jyl saıyn ótetin dástúrli «Azııa juldyzdary» básekesinde el namysyn jeńil atletıkanyń 20-dan asa túrinen 100-ge jýyq sportshy qorǵaǵaly otyr. Ázirge bul dodaǵa ózge shet elderden naqty qaı memleketterdiń sportshylary qatysatyny belgisiz. Óıtkeni jarysqa qatysýshylar aldymen Azııa jeńil atletıka federatsııasyna suranym berýi kerek. Oǵan qaı elder qatysatynyn solar sheshedi», - deıdi Pavel Novıkov.
