Jeńil atletıkadan Qazaqstan áıelder komandasy álem chempıonatyna joldama aldy
NUR-SULTAN. QazAqparat - Iokogamada (Japonııa) jeńil atletıkadaǵy estafetalyq jarys túrlerinen álem chempıonaty bastaldy. Qazaqstan áıelder komandasy fınaldyq kezeńge óte alǵan joq. Dese de, bizdiń komanda Dohadaǵy álem chempıonatyna joldama ıelendi, dep habarlaıdy Olympic.kz.
Estafetadan Qazaqstan komandasynyń sapynda Svetlana Golendova, Rıma Kashafýtdınova, Olga Safronova, Elına Mıhınalar synǵa túsken bolatyn. Olar jarysty 10-shy orynmen aıaqtady. Bul 2019 jyldyń 28 qyrkúıeginde Katardyń Doha qalasynda bastalatyn álem chempıonatyna qatysý úshin jetkilikti nátıje.
Bizdiń komanda óz tobynda márege besinshi bolyp kelse, jalpy esepte 10-shy oryn ıelendi.
Al aralas komandalyq estafetada (Mıhaıl Lıtvın, Andreı Sokolov, Elına Mıhına, Svetlana Golendova) Qazaqstan komandasy 16 komandanyń ishinen 16-shy oryn ıelenip, kósh sońynda qaldy.
Estafetalyq jarys túrlerinen álem chempıonaty 11-12 mamyr kúnderi ótetinin esterińizge salamyz.
