Jeńil atletıkadan el chempıonaty: 60 metrge júgirýden otyz jyl ózgermegen rekord jańardy
NUR-SULTAN. QazAqparat - Óskemen qalasynda ótken jeńil atletıkadan Qazaqstan chempıonatynda Qaraǵandy quramasy birinshi orynǵa ıe boldy. 21 jasar qaraǵandylyq Davıd Efremov 60 metrge júgirýde eldiń rekordshysy atandy, dep habarlaıdy QazAqparat tilshisi.
Bul dıstantsııada otyz jyl boıy Andreı Gýtovtyń rekordyn eshkim jańarta almaǵan bolatyn. 1992 jyly jeńil atlet 7,78 s ishinde 60 metrdi júgirip ótken.
Davıd Efremov bul kórsetkishten asyp túsip, atalmysh qashyqtyqty 7,67 sekindta júgirip ótti. Qaraǵandylyq sportshy naýryz aıynda Nankın qalasynda (Qytaı) ótetin álem chempıonatyna normatıvti oryndady. Jerlesimizdi Nıkolaı Barsanov jattyqtyrady.
Abaı Qunanbaevtyń 175 jyldyǵyna arnalǵan jeńil atletıkadan Qazaqstannyń XXIX chempıonaty 17-18 qańtarda Óskemen qalasynda Olga Rypakova atyndaǵy sport manejinde ótti. Jarysqa elimizdiń barlyq aımaqtarynan 260 sportshy qatysty.
Birinshilikte nátıjelerdi baǵalaý úshin alǵash ret Finish LYNX «aqyldy» jabdyǵyn paıdalandy. Onyń kómegimen sportshylardyń naqty qadamdastyrý jáne fotofınıshi anyqtaldy, al barlyq derekter avtomatty túrde ekranda kórsetilip otyrdy.
Chempıonattyń qorytyndysy boıynsha jalpy komandalyq esepte Qaraǵandy oblysynyń sportshylary kósh bastady. Ekinshi oryndy Shyǵys Qazaqstan oblysynyń sportshylary, úshinshi oryndy Qostanaı oblysynyń sportshylary ıelendi.
Qaraǵandy atletteri 27 medalǵa ıe boldy, onyń ishinde 8 altyn, 13 kúmis, 6 qola.
Chempıonattyń jeńimpazdary men júldegerleri jeńil atletıkadan álem jarystarynda el namysyn qorǵaıtyn bolady. Úzdik atletter 12-13 aqpanda Qytaıda ótetin Azııa chempıonatyna joldama aldy.
