Jeńil atletıkadan Azııadaǵy eń úzdik týrnırlerdiń biri sanalatyn dástúrli «Qosanov memorıaly» ótedi
ALMATY. 29 maýsym. QazAqparat - Almatyda 30-maýsym men 1-shildede Ortalyq stadıonda jeńil atletıkadan «Qosanov memorıaly» bolady.
Bıyl 22-inshi ret uıymdastyrylyp otyrǵan bul baıraqty báseke «Azııa juldyzdary» IV Halyqaralyq týrnırimen birge ótkeli otyr.
QR Jeńil atletıka federatsııasynyń bas hatshysy Alekseı Konrattyń aıtýynsha, onda «Azııa juldyzdary» dodasyna qatysatyn elderdiń komandalary baq synaıdy. Atap aıtqanda Iran, Qyrǵyzstan, Úndistan, Fılıppın jáne oǵan qatyspaıtyn Ázirbaıjan, Grýzııa, Reseı, Mońǵolııa, Tájikstan, Túrikmenstannan arnaıy keletin ózge de sportshylar qatysady.
1960 jyly Rım Olımpıadasynda 4h100 metrlik estafetada kúmis júldeger atanǵan Ǵusman Qosanov Qazaqstan sporty tarıhynda Olımpıada oıyndarynyń kúmis medalin jeńip alǵan tuńǵysh sportshy boldy. 1964 jyly Tokıodaǵy Olımpıada oıyndarynda úzdik bestiktiń qataryna engen ol 1967 jyldan bastap jattyqtyrýshylyq qyzmetpen aınalysady. Ǵ.Qosanov sporttaǵy jetistikteri úshin ár jyldary KSRO-nyń eńbek sińirgen sport sheberi, Qazaq KSR-niń eńbek sińirgen jattyqtyrýshysy ataqtaryna ıe bolyp, Eńbek Qyzyl tý ordenimen marapattalǵan.
