Jeńil atletıkadan ÁCh: Rekord ornatqandar 100 myń dollarmen marapattalady
NUR-SULTAN. QazAqparat – Búgin, ıaǵnı 27 qyrkúıek kúni Katar astanasy Dohada jeńil atletıkadan álem chempıonatynyń alaýy jaǵylady, dep habarlaıdy QazAqparat tilshisi.
QR Ulttyq olımpıadalyq komıteti habarlaǵandaı, álemdik dodaǵa 205 memleketten jalpy esebi 3500 atlet qatysady.
«Sport padıshasy» sanalatyn jeńil atletıkadan álem birinshiliginde 47 júlde jıyntyǵy sarapqa salynady. Sondaı-aq, júldeli oryndar úshin iri kólemde aqshalaı syılyqtar bekitilgen.
Halyqaralyq jeńil atletıkalyq federatsııalar qaýymdastyǵy (IAAF) álemd chempıonatynyń júlde qory 7,53 mıllıon dollar ekenin málimdedi. Jekeleı synda jeńiske jetken sportshylar 60 myń dollarǵa ıelik etedi. Ekinshi jáne úshinshi oryn alǵan atletter tıisinshe 30 jáne 20 myń dollar syıǵa tartylmaq. Al álemdik rekordty jańartqandarǵa 100 myń dollardan bólinedi.
Esterińizge sala keteıik, osyǵan deıin jeńil atletıkadan álem birinshiliginde qazaqstandyq atletterdiń jarys kestesin jarııalaǵan bolatynbyz. Sondaı-aq, birinshilikte Qazaqstan namysyn kimderdiń qorǵaıtyny belgili bolǵan edi.
