Jeńil atletıka: Ońtústik Koreıada úsh sportshy el namysyn qorǵaıdy
ASTANA. QazAqparat - Qazaqstandyq syryqpen sekirýshi úsh sportshy Ońtústik Koreıanyń Pýsan qalasynda ótetin dástúrli halyqaralyq týrnırge qatysady, dep habarlaıdy QazAqparat tilshisi.
QR Jeńil atletıka federatsııasynyń baspasóz qyzmetiniń habarlaýynsha, atalǵan dodada elimizdiń namysyn bul jarysta Nıkıta Fılıppov, Sergeı Grıgorev jáne Mıhaıl Býda qorǵaıdy. Týrnır 18-19 mamyr kúnderi ótedi.
Bul jarysqa jylda álemniń eń úzdik syryqpen sekirýshileri qatysady. Olar eresekter, jastar jáne áıelder arasynda júldeni sarapqa salady. Qazaqstan atletteri osyǵan deıin Pýsanda joǵary kórsetkishterge qol jetkizip júr. Aıtalyq, 26 jastaǵy Nıkıta Fılıppov buǵan deıin úsh ret chempıon atanǵan. Sergeı Grıgorev eki ret top jarǵan. Mıhaıl Býda bir márte jastar arasynda birinshi oryn, bir ret qola júlde enshilegen.
Ońtústik Koreıaǵa Qazaqstan sportshylaryn Sergeı Kýlıbaba bastap barady.
Jarys kestesine sáıkes jastar aldymen 18 mamyrda saıysqa túsedi. Atalmysh doda IAAF sertıfıkatyna ıe bolǵan.
