Jeńil atletıka: Qytaıda ótetin álem chempıonatyna 8 sportshy barady
ASTANA. QazAqparat - Aldaǵy 5-6 mamyrda Qytaıdyń Taıtsan qalasynda sporttyq júristen álem chempıonaty ótedi, dep habarlaıdy QazAqparat QR Jeńil atletıka federatsııasynyń resmı saıtyna silteme jasap.
Eki jylda bir uıymdastyrylatyn dúnıejúzilik dodaǵa Qazaqstan sportshylary da qatysady.
Taıtsan álem chempıonatyn osymen ekinshi ret ótkizgeli otyr. Eń alǵash ret 2014 jyly ótkizilgen. Álem chempıonatynda 12 medal jıyntyǵy sarapqa salynady (6 medal jekeleı, 6 medal komandalyq esep boıynsha).
Atalǵan birinshilikte el namysyn 8 sportshy qorǵamaq. Onyń ishinde 20 shaqyrymǵa sporttyq júristen 5 atlet barady (2 er, 3 áıel). Jasóspirimder arasyndaǵy 10 shaqyrymǵa 3 atlet qatysady (1 bozbala, 2 boıjetken). Sondyqtan áıelder jekeleı jáne komanda retinde de óner kórsetedi.
Erlerden ulttyq quramanyń kóshbasshysy Georgıı Sheıko (BQO) men almatylyq Vıtalıı Terehın el namysyn qorǵaıdy. 1999-2000 jyly týǵan bozbalalardan 17 jastaǵy Ahmedı Kahramanovqa senim artylyp otyr. Boıjetkenderden 18 jastaǵy Ekaterına Shlykova men 17 jastaǵy Valentına Zalevskaıa qatysady.
Áıelderden 3 orynǵa 4 atlet úmitker. Onyń ishinde Japonııanyń Nomı qalasynda ótken Azııa chempıonatyna qatysqan Dıana Aıdosova men Regına Rykovadan bólek, úshinshi joldamaǵa Polına Repına men Galına ıAkýsheva úmitti.
