Jeńil atletıka: Qytaıda ótetin álem chempıonaty 2021 jylǵa aýystyryldy
NUR-SULTAN. QazAqparat – 2020 jyly naýryzda Qytaıda josparlanǵan jeńil atletıkadan jabyq ǵımaratta ótetin álem chempıonaty koronavırýstyń kesirinen 2021 jylǵa aýystyryldy, dep habarlaıdy QazAqparat tilshisi.
QR Ulttyq olımpıadalyq komıteti habarlaǵandaı, álem chempıonaty ústimizdegi jyldyń 13-15 naýryz aralyǵynda Qytaıdyń Nankın qalasynda ótýi kerek bolatyn. Alaıda, Halyqaralyq federatsııanyń baspasóz qyzmeti atalǵan birinshilikti (2020 jyldyń 13-15 naýryzy) 2021 jyldyń naýryzyna aýystyrý týraly sheshim qabyldaǵanyn jarııalady.
«Qytaı koronavırýspen kúreste aıanyp qalmaıdy. Al biz sol úshin olarǵa bar jaǵdaıdy jasaýymyz qajet. Biz sportshylar men federaldy bılikterge jáne seriktesterge bul aımaqtaǵy sporttyq jarysqa qatysty máseleniń qalaı sheshilip jatqanyn naqty jetkizýimiz kerek. Bul álem chempıonatyn ótkizbeý týraly sheshim qabyldaǵan joqpyz. Óıtkeni, kóptegen sportshylar bul týrnırdi asyǵa kútip júr. Sol sebepti, jarysty 2021 jylǵa aýystyrdyq», - delingen habarlamada.
Esterińizge sala keteıik, osyǵan deıin habarlaǵanymyzdaı Qytaıdyń Ýhan qalasynda (Hýbeı provıntsııasy) taraǵan koronavırýs indetine baılanysty Hanchjoýda josparlanǵan jabyq keshendegi IX Azııa chempıonaty da ótpeıtini týraly jazǵan bolatynbyz.
Sondaı-aq, Qytaıdyń Dýngýan qalalyq okrýginde 4-8 aqpan aralyǵynda tennısten ótýi tıis bolǵan Federatsııa kýbogy koronavırýstyń taraýyna baılanysty ol elde ótpeıtini belgili bolǵan.
Buǵan qosa Halyqaralyq Olımpıada komıtetiniń jumys toby Qytaıdyń Ýhan qalasynda ótýi tıis Bokstan 2020 jylǵy Tokıo Olımpıadasyna Azııa/Okeanııa aımaqtyq irikteý týrnırin de qaýipti vırýstyń taralýyna baılanysty ózge elde ótkizýge sheshim qabyldaǵan edi .
