Jeńgetaılyqty kásip etken azamat sottaldy
TALDYQORǴAN. QazAqparat - Almaty oblysynda adam saýdasymen aınalysqan er azamat 6 jyl 8 aıǵa sottaldy, dep habarlaıdy QazAqparat tilshisi.
«Tekeli qalasynyń turǵyny Sabyrbaı Keles QR QK 128 babynyń 3 bóligimen kináli dep tanyldy. Múlki tárkilenip, 6 jyl 8 aıǵa bas bostandyǵynan aıyrý jazasy taǵaıyndaldy. Sot úkimi kúshine engen joq», dedi oblystyq sottyń baspasóz qyzmetiniń ókili Aınash Rahymbaeva.
1983 jylǵy azamat qyzdardy shet el asyryp, erkekterdiń qoınyna salyp berýdi maqsat etken. Qytaı elindegi qonaq úılerge boıjetkenderdi jetkizgeni úshin 500 myń teńgeden astam aqy alýdy kózdegen. Tipti qyzdardyń vızasyn rásimdep, jolǵa shyqpaq bolǵan. Alaıda, qarakózderdiń biri 34 jastaǵy azamattyń bul isine kúdiktenip, ishki ister organyna aryzdanǵan. Jeńgetaılyqty kásip etýdi kózdegen azamat endi 7 jylǵa jýyq ómirin temir torda ótkizedi. Atalǵan is Taldyqorǵan qalalyq sotynda qaraldy.
