Jenevada tsıfrlyq platformalarǵa arnalǵan alǵashqy jahandyq standart qabyldandy
ASTANA. KAZINFORM – Qujat Jenevada ótken, álemniń 187 elinen úkimetter, jumys berýshiler men qyzmetkerler ókilderin jınaǵan Halyqaralyq eńbek konferentsııasynyń 114-sessııasynyń sońǵy kúni bekitildi, dep habarlaıdy BUU Jańalyqtary.
Halyqaralyq eńbek uıymy (HEU) platformalyq ekonomıkadaǵy laıyqty eńbek týraly konventsııany qabyldady. Bul — tsıfrlyq platformalar arqyly atqarylatyn jumysty retteıtin álemdegi alǵashqy halyqaralyq standart.
— Bul — shyn máninde tarıhı oqıǵa. Alǵash ret jumys berýshiler, qyzmetkerler jáne úkimetter eńbek salasynyń búgini men bolashaǵyna arnalǵan konventsııany konsensýs negizinde qabyldady, — dedi HEU-nyń eńbek jaǵdaılary sapasy departamentiniń dırektory Sýktı Dasgýpta.
Platformalyq ekonomıka — jetkizýshiler men tutynýshylar arasynda deldal bolatyn tsıfrlyq platformalardaǵy ekonomıkalyq qyzmet. Platforma taýardy ózi óndirmeıdi, kerisinshe, taýar nemese qyzmet usynatyndar men ony izdeýshilerdiń basyn qosatyn alań qalyptastyrady. Mysaly, Uber júrgizýshiler men jolaýshylardy baılanystyrady, Airbnb baspana ıeleri men saıahatshylardy toǵystyrady, al Amazon satýshylar men satyp alýshylardy biriktiredi. Mundaı platformalar suranys pen usynysty jyldam ári tıimdi sáıkestendirý úshin algorıtmder men tsıfrlyq ınfraqurylymdy paıdalanady.
Sońǵy jyldary platformalyq ekonomıka eńbek naryǵyn túbegeıli ózgertti. Ol mıllıondaǵan adamǵa tabys tabýdyń jańa múmkindikterin ashqanymen, kóptegen qyzmetkerdi qarapaıym kepildikter men áleýmettik qorǵaýdan tys qaldyrdy.
Konventsııa tsıfrlyq eńbek platformalarynyń barlyq túrin qamtıdy jáne qyzmetkerlerdiń eńbek mártebesi qalaı jiktelgenine qaramastan qoldanylady. Negizinde bul qujat qarqyndy damyp kele jatqan sektorda laıyqty eńbek jaǵdaılaryn qamtamasyz etýge baǵyttalǵan jahandyq erejelerdi belgileıdi.
— Konventsııa jobasyn talqylaý barysynda bizdi mıllıondaǵan tsıfrlyq platforma qyzmetkerleri baqylap otyrǵanyn túsindik. Olar osy kúrdeli kelissózderdiń nátıjesin úlken úmitpen kútti.Biz olardyń úmitin aqtaı almaýǵa tıis edik. HEU platformalyq ekonomıkaǵa erekshe nazar aýdara otyryp, eńbek salasynyń búgini men bolashaǵyn qalyptastyrýǵa áli de qabiletti, — dedi Halyqaralyq eńbek uıymynyń bas dırektory Jılber Ýngbo.
Konventsııa platformalar qyzmetkerlerin burynnan alańdatyp kelgen máselelerdi qamtıdy. Olardyń qatarynda zorlyq-zombylyq pen qýdalaýdan qorǵaý, ádil eńbekaqy tóleý jáne áleýmettik qorǵaý júıesine qoljetimdilik bar.
Qujatta sondaı-aq algorıtmder men avtomattandyrylǵan sheshim qabyldaý júıeleriniń ashyqtyǵyna erekshe kóńil bólingen. Óıtkeni bul quraldar kimniń tapsyrys alatynyn, qansha tabys tabatynyn jáne qandaı táýekelderge tap bolatynyn barǵan saıyn kóbirek aıqyndap keledi.
Buǵan deıin Qazaqstannyń neǵurlym keshendi baǵdarlamalyq formatqa kóshýdi, atap aıtqanda Qazaqstan Respýblıkasy men Halyqaralyq eńbek uıymy arasyndaǵy laıyqty eńbek jónindegi eldik baǵdarlama jobasyn ázirleýdi josparlap otyrǵany habarlanǵan bolatyn.
