Jenevada Semeı kelisiminiń 20 jyldyǵyna arnalǵan jıyn ótti
ASTANA. KAZINFORM — Qazaqstannyń BUU Jenevadaǵy bólimshesi janyndaǵy Turaqty ókildigi Qyrǵyzstan, Tájikstan, Túrikmenstan jáne Ózbekstan dıplomattarymen birlesip, Semeı kelisiminiń 20 jyldyǵyna arnalǵan jıyn ótkizdi. Basqosý Ortalyq Azııada ıadrolyq qarýdan azat aımaq qurý týraly kelisimge qol qoıylǵanyna 20 jyl tolýyna oraı uıymdastyryldy, dep habarlaıdy Kazinform tilshisi.
Jıynǵa Afrıka, Latyn Amerıkasy men Karıb basseıni, Ońtústik-Shyǵys Azııa jáne Tynyq muhıtynyń ońtústigindegi ıadrolyq qarýdan azat aımaqtarǵa kiretin memleketterdiń ókilderi qatysty. Sondaı-aq basqosýǵa ıadrolyq derjavalar, Qarýsyzdaný jónindegi konferentsııaǵa múshe elder men halyqaralyq ári úkimettik emes uıymdardyń ókilderi jınaldy.
Jenevadaǵy BUU janyndaǵy Qazaqstannyń turaqty ókili Erjan Qazyhan men Jenevadaǵy BUU keńsesiniń Bas dırektory Tatıana Valovaıa qatysýshylar aldynda sóz sóıledi.
Qazaqstan elshisi elimizdiń ıadrolyq qarýsyzdaný jáne ıadrolyq qarýdy taratpaý jónindegi álemdik bastamalarǵa qosqan úlesin atap ótip, Semeı kelisiminiń saıası ári praktıkalyq mánine toqtaldy.
— Ortalyq Azııadaǵy ıadrolyq qarýdan azat aımaqtyń 20 jyldyǵy atalyp jatqan tusta oǵan tóraǵalyq etý — Qazaqstan úshin aıryqsha mártebe. Bul mereıtoı ótken jetistikterdi saralap qana qoımaı, ıadrolyq qater kúsheıgen kezeńde Ortalyq Azııanyń tájirıbesin baǵamdaýǵa múmkindik beredi, — dedi Erjan Qazyhan.
Ol búginde álemdegi ahýal barǵan saıyn shıelenisip bara jatqanyn aıtty. Onyń aıtýynsha, strategııalyq básekelestik kúsheıip, qarý-jaraqty baqylaýdyń negizgi tetikterine qysym artyp keledi. Al ıadrolyq qarýdy taratpaý men qarýsyzdanýdyń halyqaralyq júıesi eleýli syn-qaterlerge tap bolyp otyr.
— Osyndaı jaǵdaıda ıadrolyq qarýdan azat aımaqtar turaqtylyq pen ózara senimdi nyǵaıtyp, ustamdylyqty saqtaýǵa yqpal etedi. Olar qaýipsizdikke ıadrolyq qarý arqyly emes, zańdy mindettemeler, ashyqtyq, baqylaý jáne yntymaqtastyq arqyly qol jetkizýge bolatynyn dáleldeıdi. Ortalyq Azııa — osynyń aıqyn úlgisi. Kezinde munda ıadrolyq synaqtar júrgizilgen jáne jappaı qyryp-joıatyn qarý ornalasqan. Búginde bizdiń el ıadrolyq qarýdan azat aımaqqa aınaldy, — dedi Erjan Qazyhan.
Aıta keteıik, halyqaralyq deńgeıde «Semeı kelisimi» dep atalatyn qujatqa 2006 jylǵy 8 qyrkúıekte Semeıde Ortalyq Azııanyń bes eliniń syrtqy ister mınıstrleri qol qoıǵan.
Bıyl Jenevadan bólek, Vena men Nıý-Iorkte de osyndaı jıyndar ótedi. Olar 2026 jylǵy úsh aıtýly dataǵa arnalǵan: Semeı ıadrolyq synaq polıgonynyń jabylǵanyna — 35 jyl, Semeı kelisimine — 20 jyl jáne ıAdrolyq synaqtarǵa jappaı tyıym salý týraly sharttyń qabyldanǵanyna — 30 jyl.
Buǵan deıin Semeı ıadrolyq qaýipsizdik aımaǵynyń shekarasy tolyq belgilengeni habarlanǵan bolatyn.
Aqzat Jıenalına
