Jenevada plastıkpen qorshaǵan ortany lastaýmen kúres jónindegi kelissózder sátsiz aıaqtaldy

ASTANA. KAZINFORM — Jenevada 10 kún boıy ótken kelissózder barysynda álemniń 184 eliniń ókilderi plastıkpen qorshaǵan ortany lastaýmen kúres jónindegi jahandyq kelisimge kele almady, dep habarlaıdy AZƏRTAC. 

Kelissózderdi basqarǵan Ekvador ókili Lýıs Vaıas Valdıveso qatysýshylardyń ustanymdaryna negizdelgen eki joba ázirlep, Jenevada tanystyrdy. Sońǵy nusqa 15 tamyz kúni tańerteń jarııalandy, biraq ol neǵurlym aýqymdy kelisim qabyldaýdy talap etken memleketterdi qanaǵattandyrmady.

The Guardian jazýynsha, eń úlken pikirtalas jańa plastık óndirisin shekteý máselesinde týyndady. Buǵan qarsy shyqqan munaı men gaz óndiretin elder, sonyń ishinde Reseı men Saýd Arabııasy, plastıkti qaıta óńdeý jáne qaıta paıdalaný baǵytynda jumys isteýdi usyndy. Al shamamen 100-ge jýyq el plastık óndirisin shekteýdi qoldap otyr. Olardyń kópshiligi sonymen qatar óndiriste ýly hımııalyq zattardy qoldanýdy jahandyq deńgeıde baqylaýǵa alýǵa shaqyryp otyr.

— Men ashýlymyn, óıtkeni kóptegen adamnyń shynaıy kúsh-jigerine jáne pikirtalastardaǵy naqty progreske qaramastan, eshqandaı naqty nátıje bolǵan joq, — dedi Frantsııa ekologııa mınıstri Anes Pane-Rıýnashe qorytyndy otyrysta.

Kolýmbııa delegaty Handel Rodrıges kelisimge «jaı ǵana kelisimge kelgisi kelmegen azdaǵan memleketter» kedergi jasaǵanyn atap ótti. Rodrıges bul sózinde munaı óndirýshi elderdi meńzegen.

Saýd Arabııasy usynylǵan jobalardyń eshqaısysy teńgerimdi bolmaǵanyn, al sońǵy usynys basqa memleketterdiń pikirlerin kóbirek eskergenin aıtty.

39 shaǵyn araldyq damýshy memleketterdiń atynan sóz sóılegen Palaý Respýblıkasy kelisimsiz úılerine oralatyndaryna ókinish bildirdi.

— Bizde oǵan eń az qatys bolsa da, taǵy bir jahandyq ekologııalyq daǵdarystyń negizgi aýyrtpalyǵyn shaǵyn araldyq damýshy memleketter kóterýi ádiletsiz, — dedi Palaý ókili.

Aıta keteıik, Birikken Ulttar Uıymy sońǵy úsh jylda plastık máselesi boıynsha kelissózderdi altynshy ret ótkizdi. 5 tamyzda Jenevada 1000-nan astam delegat jınaldy. BUU ókilderi plastık jónindegi kelisimdi qoldaýshylar ony mańyzdylyǵy jaǵynan Parıj klımattyq kelisimimen salystyratynyn atap ótti.

Álemde jyl saıyn 400 mıllıon tonnadan astam jańa plastık óndiriledi. Eger plastık óndirisine qatysty jaǵdaı ózgermese, 2040 jylǵa qaraı bul kólem 70%-ǵa artady. 

Aıta ketelik BUU 2060 jylǵa qaraı plastık qaldyqtarynyń kólemi úsh esege artýy múmkin ekenin aıtqan.