Jenevada Keden odaǵynyń Eýropalyq erkin saýda qaýymdastyǵymen kelissózder júrip jatyr
NSK. 30 tamyz. QazAqparat /Aıtýar Mamlın/ - Bul kúnderi Jenevada Keden odaǵy múshe-memleketteri men Eýropalyq erkin saýda qaýymdastyǵy arasynda erkin saýda kelisimin jasasý úshin kelissózderdiń úshinshi raýndy ótip jatyr.
Bul týraly Belarýs Respýblıkasy syrtqy ister mınıstrliginiń baspasóz qyzmeti habarlady.
Keden odaǵy elderi men Eýropalyq erkin saýda qaýymdastyǵy taýarlar men qyzmetter saýdasyn retteý máselelerimen qatar zııatkerlik menshik, ınvestıtsııalar, taýarlardyń shyqqan jeri men kedendik rásimder, saýdany ońaılatý, saýdadaǵy tehnıkalyq kedergiler, sanıtarlyq jáne fıtosanıtarlyq sharalar, saýda jáne qorshaǵan ortanyń ózara baılanysty sııaqty birqatar aýqymdy máselelerdi talqylaıtyn bolady.
Keden odaǵy men Eýropalyq erkin saýda qaýymdastyǵy arasyndaǵy erkin saýda týraly kelisim taýarlardy jyljytý jáne kapıtal, tehnologııalar tartý, qatysýshy elderdiń básekege qabilettiligin kúsheıtý, sondaı-aq taraptardyń iskerlik ortasy arasynda yntymaqtastyqty tereńdetý úshin qolaıly jaǵdaı jasaıdy.
