Jenevada Qazaqstannyń Táýelsizdik kúnine arnalǵan fotokórme ótti

ASTANA. QazAqparat -  Keshe, 5 jeltoqsanda Jeneva qalasyndaǵy BUU Ulttar Saraıynda  QR Táýelsizdik kúnine jáne elimizdiń BUU-ǵa músheliginiń 25 jyldyǵyn atap ótý boıynsha is-sharalar aıasynda «Qazaqstan - Uly Dala eli» taqyrybyndaǵy fotokórme ashyldy. 

Atalmysh kórmeni Qazaqstannyń Turaqty ókildigi men shveıtsarııalyq Ibrahım Kodra qory birlesip uıymdastyrdy, dep habarlaıdy  QR Syrtqy ister mınıstrliginiń baspasóz qyzmeti.

 Ashylý saltanatynda Qazaqstannyń BUU janyndaǵy Turaqty ókili Janar Aıtjanova jáne BUU mádenıet boıynsha komıtetiniń tóraǵasy Franchesko Pızano sóz sóıledi. Sonymen qatar, is-sharaǵa Jenevada akkredıttelgen dıplomatııalyq mıssııalar men halyqaralyq uıymdardyń basshylary, jergilikti isker top  jáne úkimettik emes uıymdardyń ókilderi qatysty.

 

Іs-sharanyń basty maqsaty Qazaqstannyń alýan túrliligin, tabıǵı sulýlyǵyn jáne aýqymdy áleýetin kórsetý, sondaı-aq elimizdiń qaıtalanbas jerlerine qyzyǵýshylyq týdyrý bolyp tabylady. Atap aıtqanda, kórme qonaqtaryna elimizdiń iri qalalarynyń tartymdy tustary, mádenı jáne tarıhı eskertkishteri, biregeı jáne sırek kezdesetin tabıǵatymyzdyń, sondaı-aq salt-dástúrlerimiz beınelengen alpysqa jýyq fotosýretter usynyldy.

Bul jumystardyń avtorlary - Arman Baısadyqov, Qarlyǵash Bókenova, Marlen Ibraev, Ospan Álı, Jáken Taımaǵambetov, Elmıra Ábdirahımova sııaqty elimizge tanymal fotosýretshiler.

 

Fotokórme 2017 jylǵy 15 jeltoqsanǵa deıin jalǵasatyn bolady.