Jenevada Dúnıejúzilik densaýlyq saqtaý assambleıasynyń 78-sessııasy bastaldy
JENEVA. KAZINFORM — Shveıtsarııanyń Jeneva qalasynda Dúnıejúzilik densaýlyq saqtaý uıymynyń (DDSU) eń joǵarǵy sheshim qabyldaıtyn organy — Dúnıejúzilik densaýlyq saqtaý assambleıasynyń (DDSA) 78-sessııasy ashyldy, dep jazdy Anadoly agenttigi.
Gaza sektoryndaǵy blokadaǵa baılanysty asharshylyq pen gýmanıtarlyq apat qaýpi artyp otyr, – dep málimdedi DDSU bas dırektory Tedros Adhanom Gebreıesýs.
BUU-nyń Jenevadaǵy bólimshesinde ótip jatqan ashylý saltanatynda sessııa tóraǵasy bolyp Fılıppın densaýlyq saqtaý mınıstri Teodoro Haver Herbosa saılandy.
DDCU Bas dırektory Tedros Adhanom Gebreıesýs ashylý rásiminde sóılegen sózinde, Gaza sektorynda polıomıelıtke qarsy vaktsınalaý naýqanynyń arqasynda aýrýdyń taralýynyń aldyn alý múmkin bolǵanyn aıtty. Alaıda, onyń aıtýynsha, aımaq halqy áli de kóptegen qaýip-qaterge tap bolyp otyr.
— Sońǵy blokadadan beri eki aı ótti. Eki mıllıon adam ashtyqtan qyrylyp jatqanda, 116 myń tonna azyq-túlik shekarada, kólikpen sanaýly mınýttyq jerde turyp qalǵan. Gýmanıtarlyq kómekti, sonyń ishinde azyq-túlikti ádeıi bógep ustaý — Gazadaǵy asharshylyq qaýpin kúsheıte tústi. Qaqtyǵystyń ýshyǵýy, evakýatsııaǵa qatysty buıryqtar, gýmanıtarlyq keńistiktiń tarylýy jáne kómek kórsetýdiń bógelýi — densaýlyq saqtaý júıesin kúıretip, jappaı adam ólimine ákelip soqty, — dedi ol.
DDSU basshysynyń aıtýynsha, dári-dármekter shekarada turǵan kezde, Gaza turǵyndary aldyn alýǵa bolatyn aýrýlardan kóz jumyp jatyr, al aýrýhanalarǵa jasalǵan shabýyl saldarynan medıtsınalyq kómek kórsetý múmkin bolmaı otyr.
Gebreıesýstyń málimetinshe, 2023 jyldyń qarashasynan beri DDSU 7300-den astam naýqasty, onyń ishinde 617 onkologııalyq aýrýy bar adamdy medıtsınalyq evakýatsııamen qamtamasyz etken. Alaıda Gaza sektorynda áli de 10 myńnan astam adam shuǵyl evakýatsııaǵa muqtaj.
— Biz DDSU-ǵa múshe elderge taǵy da kóbirek naýqastardy qabyldaýdy suraımyz. Sonymen qatar, Izraıl evakýatsııaǵa ruqsat berip, ómirlik mańyzdy azyq-túlik pen dári-dármekterdiń kirýine jol ashýyn talap etemiz, — dep atap ótti ol.
Buǵan deıin habarlanǵandaı, Gaza sektoryndaǵy gýmanıtarlyq kómek taýsyldy, ashtyq kúsheıip barady.