Jemis-kókónis qaldyqsyz óńdeledi: Ǵalymdar jańa tehnologııa usyndy

Bul tehnologııa tabıǵı tikeleı syǵylǵan shyryndar, djemder men joǵary fýnktsıonaldyq qasıetteri bar pıýre ónimderin óndirýge múmkindik beredi.

Atalǵan ázirleme Qazaqstandaǵy jemis-kókónis ónimderin óńdeý salasyna aıtarlyqtaı tyń serpin beredi. Elde jyl saıyn 3,5 mln tonna ónim óndirilgenimen, onyń tek 5%-y ǵana ónerkásiptik óńdeýden ótedi. Al saqtaý kezindegi shyǵyndar 30%-dan asady. Nátıjesinde konservilengen ónimder naryǵyndaǵy ımporttyń úlesi 80–85%-ǵa deıin jetip otyr.

Jobanyń negizgi maqsaty — otandyq fýnktsıonaldyq ónimderdi ázirleý jáne resýrsty únemdeıtin, qaldyqsyz tehnologııalardy engizý arqyly tabıǵı shyryndar assortımentin keńeıtý.

Ázirlemeniń ǵylymı jańalyǵy — qyzylsha, sábiz jáne alma shyryndary negizinde pektın qosylǵan ońtaıly kýpajdalǵan retseptýralardy jasaý. Tehnologııa jergilikti shıkizatty tereń óńdeýge baǵyttalyp, onyń bıologııalyq qundylyǵyn — antıoksıdanttar, dárýmender men taǵamdyq talshyqtardy barynsha saqtaýdy qamtamasyz etedi.

— Termoóńdeý men gomogenızatsııa protsesterin ońtaılandyrý tehnologııalyq shyǵyndardy azaıtyp, daıyn ónimniń sapasyn arttyrýǵa múmkindik berdi. Alynǵan ónimder profılaktıkalyq qasıetterge ıe jáne júrek-qan tamyrlary aýrýlary men zat almasý buzylystary bar adamdarǵa paıdaly bolýy yqtımal. Joba aıasynda ǵylymı nátıjeler halyqaralyq basylymdarda jarııalanyp, ónim óndirý tehnologııasy men pektın alý ádisine patent alyndy, — delingen habarlamada.

Atalǵan tehnologııany agroónerkásiptik keshen kásiporyndarynda, ásirese elimizdiń ońtústik óńirlerinde engizý ımportqa táýeldilikti edáýir tómendetip, durys tamaqtaný ónimderi naryǵyndaǵy suranysqa ıe jańa segmentti damytýǵa múmkindik beredi.

Osyǵan deıin jemis sharaptaryn óndirýge baqylaý kúsheıtilýi múmkin ekenin jazǵanbyz.