Jemqorlyqty joıý jáne aldyn alý jumystary is júzinde júrgizilýi tıis – Alık Shpekbaev
Agenttik tóraǵasynyń eki kúndik jumys sapary Bórli aýdanynan bastalyp, ol osynda servıstik ákimdik jumysymen tanysty.
Ákimdikke jyl basynan beri 1200 áleýmettik qyzmet alýǵa myńǵa jýyq azamat ótinish bildirdi, onyń 800-i onlaın túrde berildi.
Alık Shpekbaev bir mezgilde 300 adamdy qabyldaı alatyn jáne sporttyń 19 túri boıynsha jattyǵatyn «Qarashyǵanaq» sport keshenine bardy. Meımannyń aıtýynsha, sport kesheninde oqýshylar úshin barlyq jaǵdaı jasalǵan, sondyqtan sportshylarǵa jaıly jer izdep, basqa qalalarǵa ketýdiń qajeti joq.
Agenttik tóraǵasy «Qarashyǵanaq Petroleým Opereıtıng B.V.» kompanııasyn aralaý barysynda óndirýshi salalardaǵy jemqorlyqtyń aldyn alýdyń strategııalyq mańyzdylyǵyn atap ótip, korporatıvtik komplaens-qyzmeti jumysynyń nátıjelerimen tanysty.
«Memleket basshysynyń saıası erik-jigeriniń arqasynda biz kvazımemlekettik sektorda ǵana emes, jeke korporatıvtik sektorda da sybaılas jemqorlyqqa qarsy tıimdi komplaensti engizý úshin senimdi quqyqtyq negiz qaladyq. Integrity ıdeologııasyn nasıhattaý dál osyndaı iri salalyq kompanııalardan bastalýy tıis. Kásipkerler tazalyq pen parasattylyq standarttaryn saqtaýǵa neǵurlym kóp kóńil bólse, soǵurlym tezirek básekege qabilettilikke qol jetkizemiz», - dedi A.Shpekbaev.
Bıylǵy 17 qazannan bastap kvazımemlekettik sektor uıymdarynda parasattylyqtyń korporatıvtik standarttaryn saqtaýǵa jaýapty jemqorlyqqa qarsy komplaens-qyzmetter ınstıtýty zańnamalyq deńgeıde engizilgen bolatyn.
Sondaı-aq Sybaılas jemqorlyqqa qarsy qyzmet basshysy basshylardyń óz ujymdarynda jemqorlyqty joıý jáne onyń aldyn alýmen aınalysý mindeti qur sóz emes, is júzinde bolýy kerektigin basa aıtty.
Kórshiles Shyńǵyrlaý aýdanynda agenttiktiń jumys toby men qoǵam qaıratkerleri jańa servıstik ákimdik ashty. Onda turǵyndardyń jaıly jaǵdaıyn arttyrýǵa septigin tıgizetin 54 túrli memlekettik qyzmet kórsetiletin bolady. Aýdan mektepteriniń birinde «e-Ashana» tsıfrlyq jobasyn júzege asyrý týraly bastama kótergen «Adal urpaq» klýbynyń qyzmeti tanystyryldy.
Agenttik tóraǵasy memlekettik kirister basqarmasyna baryp, Shyńǵyrlaý aýdanynyń aktıvimen, jurtshylyǵymen jáne bıznes qaýymdastyǵy ókilderimen kezdesti.
Ol jergilikti bıýdjetterdiń ońtaıly jumsalýyna baqylaýdy kúsheıtý qajettigin ataı otyryp: «Agenttik «Ashyq bıýdjetterdiń ınteraktıvti kartasy» negizinde «Ashyq bıýdjet» biregeı jobasyn iske asyrýda. Ol qoǵamdyq baqylaýǵa jáne azamattardyń qarjylyq saýattylyǵyn arttyrýǵa jańa serpin beredi. Ony iske asyrýmen agenttiktiń aýmaqtyq departamentteriniń qyzmetkerlerinen, «Adaldyq alańy» jobalyq keńseleriniń múshelerinen jáne azamattyq qoǵam ınstıtýttarynyń ókilderinen turatyn arnaıy jumys toby aınalysady. Sondyqtan jurtshylyqty jemqorlyqqa qarsy tehnologııalardyń zamanaýı quraldaryn belsendi qoldanýǵa shaqyramyn», - dedi.
Alık Shpekbaev Shyyńǵyrlaý aýdanynda «Adaldyq alańy» respýblıkalyq jobalyq keńsesiniń basshysy Tólegen Baıǵulovpen jáne «Adal kómek» jobasynyń jetekshisi Aıman Omarovamen birge «Halyq úni» jobasy aıasynda azamattardy qabyldady.
Eske sala keteıik, budan buryn Batys Qazaqstanda ádildik izdegen turǵyndardyń «Adal kómekke» júgingenin jazǵan bolatynbyz.
