Jemqorlyqtan túsken aqshaǵa arnalǵan shotta 100 mlrd teńge jatyr – Erulan Jamaýbaev

ASTANA. QazAqparat – QR Premer-Mınıstriniń birinshi orynbasary – Qarjy mınıstri Erulan Jamaýbaev jemqorlyqtan túsken aqshaǵa arnalǵan shotta qansha qarajat jatqanyna toqtaldy, dep habarlaıdy QazAqparat tilshisi.

«Prezıdenttiń tapsyrmasy boıynsha sybaılas jemqorlyq isteri aıasynda alynǵan qarajat arnaıy shotta jınalady. Bul shot bilim berý ınfraqurylymyn qoldaýǵa baǵyttalǵan. Qazir onda shamamen 100 mlrd teńge jınaqtalǵan. Bul qarajat elimizdiń mektepterin salýǵa jáne jóndeýge baǵyttalady», - dedi Erulan Jamaýbaev vedomstvonyń keńeıtilgen alqa májilisinde.

Buǵan deıin mınıstr aldaǵy naqtylaý kezinde respýblıkalyq bıýdjettiń shyǵys bóligin qysqartý josparlanǵanyn málim etken edi.

«Bıýdjetti josparlaý protsesinde shyǵyndar ońtaılandyrylady jáne bıýdjettiń teńgerimdiligin qamtamasyz etýdi kózdep otyrmyz. Jaqyn arada biz bıylǵa arnalǵan respýblıkalyq bıýdjettiń shyǵys parametrleri men baǵyttaryn naqtylaımyz. Bul rette Prezıdenttiń saılaýaldy baǵdarlamasy men Qazaqstan halqyna Joldaýynda aıtylǵan bastamalary men tapsyrmalaryna basa nazar aýdarylady», - dedi ol.