Jemqorlyqpen sottalǵan Atyraý ákiminiń orynbasary elorda túrmesine aýystyryldy
Atyraý oblysy ákiminiń birinshi orynbasary bolǵan eks-sheneýnik Nurlan Taýbaev jazasyn óteý úshin Astana qalasyndaǵy túrmege aýystyryldy. Al, oblystyq qurylys basqarmasyna jetekshilik etken Tımýr Basarov shartty túrde merziminen bosatýǵa ótinish bergen.
Buǵan deıin Atyraý oblysy ákiminiń burynǵy birinshi orynbasary 10 jylǵa sottalǵanyn jazǵan edik.
Sot Nurlan Taýbaevty QR Qylmystyq kodeksiniń 24-babynyń 3-bóligi, 366-babynyń 4-bóligimen (memlekettik qyzmetti atqaratyn laýazymdy adamnyń qorqytyp alý jolymen adamdar tobynyń aldyn ala sóz baılasýymen asa iri mólsherde para alýǵa oqtalýy), Tımýr Basarovty Qylmystyq kodekstiń 28-babynyń 5-bóligi, 24-babynyń 3-bóligi, 366-babynyń 4-bóligimen (atalǵan is-áreketterge kómektesý) kináli dep tanydy.
Sot úkimimen Nurlan Taýbaevqa 10 (on) jyl bas bostandyǵynan aıyrý jazasy taǵaıyndaldy. Onymen birge tergeýge alynǵan qurylys basqarmasynyń basshysy Tımýr Basarovqa jazany aýyrlatatyn mán-jaılar men zań talaptarynyń (jaza 8 jyl 5 aıdan aspaıdy) bolmaýy eskerile otyryp, QR Qylmystyq kodeksiniń 55-babynyń 4-bóligi qoldanylyp, 5 jyl bas bostandyǵynan aıyrý jazasy taǵaıyndaldy.
Keıin jemqorlyq babymen sottalǵan Atyraý oblysy ákimi birinshi orynbasarynyń úkimi ózgerissiz qaldy.
«Apellıatsııadaǵy is sottalýshy Nurlan Taýbaevtyń advokattarynyń apellıatsııalyq shaǵymdary jáne prokýrordyń apellıatsııalyq ótinishi boıynsha qaraldy. Advokattar úkimniń kúshin joıýdy, sottalýshyny aqtaýdy suraǵan. Qylmystyq ister jónindegi sot alqasy úkimdi ózgertý nemese kúshin joıý jáne apellıatsııalyq shaǵymdar men prokýrordyń apellıatsııalyq ótinishhatynyń dálelderin qanaǵattandyrý úshin negiz joq degen qorytyndyǵa keldi. Sot alqasynyń qaýlysymen birinshi satydaǵy sottyń Taýbaev pen Basarovqa qatysty úkimi ózgerissiz, apellıatsııalyq shaǵymdar men prokýrordyń apellıatsııalyq ótinishhaty qanaǵattandyrýsyz qaldy», -dep habarlaǵan edi Atyraý oblystyq sotynyń baspasóz qyzmeti.
