Jemqorlyqpen kúreste memleketke 14 mlrd teńge qaıtaryldy - Shpekbaev
ASTANA. QazAqparat - QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Alık Shpekbaev 2017 jylǵy sybaılas jemqorlyqqa qarsy kúres nátıjesin qorytyndylady, dep habarlaıdy «QazAqparat» HAA tilshisi.
«Bizdiń árbirimiz kún saıynǵy jumysta jemqordyń ózine paraqorlyqpen kúresýge moraldyq quqyǵy joq ekenin tolyǵymen túısinýimiz kerek. Іshki sybaılas jemqorlyqtyń árbir faktisin jasyrmaı aıtyp, ol is qylmystyq-quqyqtyq turǵyda tergelýi kerek», - deıdi Alık Shpekbaev vedomstvonyń kollegııalyq otyrysynda.
Onyń aıtýynsha, QR Memlekettik qyzmet isteri jáne sybaılas jemqorlyqqa qarsy is-qımyl agenttigi ótken jyly 1835 sybaılas jemqorlyqqa qatysty istiń betin ashqan. Bul 2016 jyldyń kórsetkishimen salystyrǵanda, 18 paıyzǵa tómen. 108 júıeli jemqorlyqtyń beti ashylyp, 320 adam qylmystyq jaýapkershilikke tartylǵan. 5 uıymdasqan qylmystyq toptyń áreketine tosqaýyl qoıylǵan. Qolǵa alynǵan sharalardyń arqasynda memleket qazynasyna 14 mlrd teńge qaıtarylǵan.
Agenttik tóraǵasynyń aıtýynsha, sybaılas jemqorlyqqa qarsy saıasattyń basty sharttarynyń biri - memlekettik apparattyń tolyqtaı tazalyǵy bolyp tabylady. Alık Shpekbaevtyń sózine súıensek, sybaılas jemqorlyqqa qarsy kúrestiń nátıjesi arqyly elimizdegi ınvestıtsııalyq klımattyń jaılylyǵyn saqtaýǵa bolady.
Qazirgi ýaqytta Agenttiktiń aýmaqtyq bólimshelerine sheteldik kompanııalardyń jumysyna tekserýshi organdardyń zańsyz aralasýynyń aldyn alý satysyn júrgizý tapsyrylyp otyr.
