Jemqorlyqpen kúresemiz dep halyqtyń únin umyttyq - Oljas Bektenov

NUR-SULTAN. QazAqparat – Sybaılas jemqorlyqqa qarsy is-qımyl agenttiginiń jumysy halyqtyń jaǵdaıyn jaqsartýǵa baǵyttalýy tıis. Bul týraly atalǵan vedomstvonyń basshysy Oljas Bektenov aıtty, dep habarlaıdy QazAqparat tilshisi.

«Jemqorlyqpen kúresemiz dep, bastysy halyqtyń únin umyttyq. Halyq ne dep jatyr? Halyq neni talap etip jatyr? Munyń bárin qaperden shyǵardyq. Ótken ǵasyrlarda jazylǵan Qasym hannyń qasqa jolynda, Esim hannyń eski jolynda, Táýke hannyń Jeti jarǵysynda, qazirgi zamandaǵy elimizdiń Ata Zańynda eń qymbat qazyna – adam», - dedi Oljan Bektenov vedomstvonyń alqa otyrysynda

Sondyqtan, ol agenttik qyzmetkerleriniń árbir isi halyqqa paıdasy bar ma, halyq qanaǵattana ma, quptaı ma degen baǵytta bolý kerektigin basa aıtty.

«Jumysymyzdyń nátıjesi tolyqtaı halyqtyń áleýmettik, ekonomıkalyq jaǵdaıyn jaqsartýǵa baǵyttalýy kerek. Jemqorlyqpen kúres múldem ózgeshe bolýy qajet. Ony búgin kórsettik, talqyladyq. Endi iske kirisip, tez arada nátıje kórseteıik», - dedi agenttik tóraǵasy.