Jemqorlyqpen kúres: ShQO-da «jasyryn satyp alýshy» tásili arqyly qoǵamdyq baqylaý júrgizilmek

ÓSKEMEN. QazAqparat – Sybaılas jemqorlyqqa qarsy is-qımyl agenttiginiń ShQO boıynsha departamenti jáne oblystyq Taýarlar men kórsetiletin qyzmetterdiń sapasy men qaýipsizdigin baqylaý departamenti arasynda medıtsına salasyndaǵy jemqorlyqty joıý maqsatynda yntymaqtastyq týraly memorandýmǵa qol qoıyldy, dep habarlaıdy QazAqparat.

Mundaǵy maqsat – densaýlyq saqtaý júıesindegi jáne farmatsevtıkalyq qyzmettegi sybaılas jemqorlyqqa tózbeýshilik kózqarasty qalyptastyrý, jemqorlyq táýekelderin azaıtý.

«Biz birinshi kezekte bul salanyń ashyqtyǵyn qamtamasyz etýimiz kerek. Memorandým aıasynda medıtsına jáne farmatsevtıka qyzmetkerleri arasynda sybaılas jemqorlyqqa qarsy mádenıetti qalyptastyrýǵa baǵyttalǵan konferentsııalar, semınarlar, dóńgelek ústelder ótkiziledi. Sondaı-aq «Shyǵys-Adaldyq alańy» jobalyq keńsesiniń jáne aımaqtyq aqparattyq-aǵartýshylyq shtaby músheleriniń qatysýymen «Jasyryn satyp alýshy» tásili arqyly qoǵamdyq baqylaý júrgizilmek», – deıdi Sybaılas jemqorlyqqa qarsy is-qımyl agenttiginiń ShQO boıynsha departamenti basshysynyń orynbasary Jiger Baıdıldın.