Jemqorlyqpen kúres saıasatyna qoǵamnyń senimi kúsheıdi - Gúlshara Ábdiqalyqova

ASTANA. QazAqparat - Sońǵy jyldary Qazaqstanda júrgizilip jatqan sybaılas jemqorlyqqa qarsy saıasatqa jurtshylyqtyń senimi kúsheıdi. Bul pikirdi Qazaqstan Respýblıkasynyń Memlekettik hatshysy Gúlshara Ábdiqalyqova Sybaılas jemqorlyqqa qarsy kúres máseleleri jónindegi Azamattyq bastamalardyń ІІ kongresinde málim etti, dep habarlaıdy QazAqparat.

Memlekettik hatshy sybaılas jemqorlyqqa qarsy is-qımyl men zańnyń ústemdigi - «Tórtinshi óndiristik revolıýtsııa jaǵdaıyndaǵy damýdyń jańa múmkindikteri» Joldaýynyń negizgi basymdyqtarynyń biri ekenin atap ótti.

«2014 jyly Qazaqstan Prezıdenti «múlde tózbeýshilik» ahýalyn qalyptastyrý arqyly sybaılas jemqorlyqqa qarsy qozǵalysqa búkil qoǵamdy tartýǵa baǵyttalǵan Sybaılas jemqorlyqqa qarsy strategııany jarııalaǵan edi.  Osy ýaqyt ishinde 64 shara atqarylyp, ákimshilik kedergini azaıtýǵa, turmystyq jemqorlyq deńgeıin tómendetýge eleýli septigin tıgizdi. Máselen, qazir barlyq óńirde azamattarǵa bıýdjet qarajatynyń ıgerilýin, maqsatqa saı qoldanylýyn, áleýmettik nysandar qurylysynyń sapasy men merzimin baqylaýǵa múmkindik beretin Qoǵamdyq baqylaý kartasy iske qosyldy. Elde júrgizilip jatqan sybaılas jemqorlyqqa qarsy saıasatqa degen jurtshylyqtyń senimi kúsheıdi», - dedi Gúlshara Ábdiqalyqova Astanada Sybaılas jemqorlyqqa qarsy is-qımyl máseleleri boıynsha azamattyq bastamalardyń 2 kongresinde.

Onyń aıtýynsha, kezekti zańnamalyq ózgerister sybaılas jemqorlyq sıpatyndaǵy quqyq buzýshylyqtyń aldyn alý júıesin jetildirýdiń quqyqtyq negizderin qalyptastyrdy.

Memlekettik qyzmettiń, quqyq qorǵaý, sot organdarynyń jáne kvazımemlekettik seklordardyń kadrlyq saıasaty qaıta qaraldy. Bul ózgerister kadrlyq korpýstaǵy sybaılastyq deńgeıin tómendetýge baǵyttalǵan. Halyqaralyq yntymaqtastyqta da Qazaqstan sybaılas jemqorlyqqa qarsy birqatar qujattardy maquldaǵan.

«Qazaqstan BUU-nyń Sybaılas jemqorlyqqa qarsy konventsııasyn, Uıymdasqan transulttyq qylmysqa qarsy konventsııany, Eýropa keńesiniń qylmystyq áreketterden túsken kiristerdi jymqyrý, anyqtaý, tartyp alý jáne tárkileý týraly konventsııalaryn ratıfıkatsııalaǵan. Odan bólek, «Sybaılas jemqorlyqqa qarsy kúres jónindegi Ystanbul jospary» monıtorınginiń ózara baǵa berýge arnalǵan sýbóńirlik baǵdarlamasyna belsendi túrde qatysyp otyrmyz. Bıyl Ystanbul josparynyń usynymdardy atqarý boıynsha tórtinshi raýndynyń monıtorıngi bastalady. Bul da ınklıýzıvti tásildi qajet etedi», - dep óz sózin túıindedi G. Ábdiqalyqova.