Jemqorlyqpen kúres: «Parasat joly» jobasy tanystyryldy
Ortalyqtardy ashýdyń maqsaty – ǵylymı, shyǵarmashylyq ıntellıgentsııa jáne din ókilderimen birlesip qoǵamda parasattylyq ıdeologııasyn ilgeriletý.
«Parasat joly» ortalyqtary ǵylymı jáne shyǵarmashylyq zııaly qaýym, memlekettik jáne qoǵamdyq uıymdar ókilderiniń, jastardyń kezdesýleri úshin dıalog alańyna aınalady. Sondaı-aq, osy alańda tikeleı efırler ótkiziletin bolady.
«Abaı da qoǵamdy synady, qoǵamnyń kemshilikterine qarsy shyqty. Osy jaǵdaı bizdiń búgingi áńgimemizge tikeleı qatysy bar. Psıhoanalıtıkterdiń aıtýynsha, kez kelgen adam óziniń aqyl-dárejesi, bilimi, parasatyna qaraı ózin ishteı qoǵamǵa úılestiredi. Ózimizdi qoǵamǵa sáıkestendirýdiń negizgi sebebi – qorqynysh. Bireý zańdy buzyp qoıýdan, endi biri uıatty bolyp qalýdan qorqady. Ár adamnyń ishki erkindigi bar. Sol ishki erkindigimiz qoǵamda bolyp jatqan jaǵdaımen qanshalyqty sáıkes? Adamnyń qoǵammen úılesimi sanaly, parasatty, mádenıetti túrde júzege asýy kerek. Eýropanyń bir qadam alda kele jatýynyń basty sebebi – olarda parasattylyq pen sanalylyq alda tur. Bizdiń qoǵamda parasattylyq máselesi qalyptasqan joq. Qoǵam men áleýmette qashan jarasymdylyq bolady – sonda ǵana tártip, tazalyq bolady», - deıdi fılologııa ǵylymdarynyń doktory, professor Shákir Ybyraev.
Aqyn, Qazaqstannyń eńbek sińirgen qaıratkeri Aqushtap Baqtygereeva bul jobanyń kitaphanadan bastalýy zańdylyq dep sanaıtynyn aıtty.
«Parasat jolynyń» kitaphanalardan bastalýy zańdy dep bilemiz, sebebi parasattyń bári kitapta. Bıliktegi el tizginin ustaıdy degen azamattarymyz jemqorlyqqa jol berip alǵany jasyryn emes. Biz keshigip qaldyq, halyq bárin kórip-bilip otyr. Endi halyq bolyp kúrespesek bolmaıdy. Sybaılas jemqorlyqqa qarsy is-qımyl qyzmeti ashylǵaly az jumys jasalǵan joq. Biraz jumys yńǵaıǵa kelip qaldy. Kúnde «Anaý ustaldy», «Mynaý ustaldy» degendi estımiz. Bul – elimiz, ultymyz úshin uıat. Bul qatelikter neden ketti? Kitaphanaǵa baryp kitap oqymaǵannan ketti. Mine, jastarǵa úlgi bolatyn jumys bastalǵan eken», - deıdi aqyn Aqushtap Baqtygereeva.
Elordada «Parasat joly» ortalyǵy 8 qańtarda Ulttyq akademııalyq kitaphana bazasynda ashylǵan bolatyn. Elordalyq tájirıbeni óńirlerge taratý maqsatynda búgin Qazaqstannyń barlyq oblystyq, qalalyq jáne aýdandyq kitaphanalarynda, Almaty jáne Shymkent qalalarynda óńirlik ortalyqtar iske qosyldy.
