Jemqorlyqpen kúres: Atyraýda áskerıler arasynda jasyryn saýalnama júrgizilýde
Garnızon basshylyǵy men QR Sybaılas jemqorlyqqa qarsy is-qımyl agenttigi Atyraý oblysy boıynsha departamentiniń birlesken otyrysy ótti. Oǵan «Batys» óńirlik qolbasshylyǵy áskerleriniń qolbasshysy, polkovnık Nurlan Aldııarov pen óńirlik departament bastyǵy Qanat Súleımenov qatysty. Sondaı-aq, qadaǵalaý organdarynyń ókilderi, garnızon bólimderi men mekemeleriniń komandırleri shaqyryldy.
Kezdesýde áskerı bólimdegi sybaılas jemqorlyq yqtımaldyǵyn barynsha azaıtý úshin qabyldanǵan, josparlanǵan sharalar týraly baıandaldy. Áskerdegi sybaılas jemqorlyqtyń aldyn-alýǵa arnalǵan birqatar beınerolık kórsetildi.
QR Sybaılas jemqorlyqqa qarsy is-qımyl agenttigi Atyraý oblysy boıynsha departamentiniń bastyǵy Qanat Súleımenov komandırlerdi kúndelikti qyzmette sybaılas jemqorlyqqa qarsy sharalardy odan ári jetildirýge, sondaı-aq vedomstvolyq baǵynysty laýazymdy tulǵalardyń sybaılas jemqorlyqqa qarsy standarttardy saqtaý úshin baqylaýdy kúsheıtýge shaqyrdy.
«Sybaılas jemqorlyq táýekelderin taldaıtyn komıssııa quramy túrli baǵyttaǵy sybaılas jemqorlyqqa qatysty quqyq buzýshylyqty jasaýǵa yqpal etetin áskerı bólimder men mekemelerdiń komandırlerine óz usynysyn berdi. Sondaı-aq, sybaılas jemqorlyq deregin anyqtaý maqsatynda jeke quram arasynda tamaqtanýdyń sapasy, áskerı tártipti buzý deregi jóninde jasyryn saýalnama júrgizý tájirıbesin jalǵastyrýǵa sheshim qabyldandy», - dedi «Batys» óńirlik qolbasshylyǵy áskerleri qolbasshysynyń tárbıe jáne ıdeologııalyq jumystar basqarmasynyń aǵa ofıtseri kapıtan Qanat Djaparov.
Eske sala ketelik, budan buryn Atyraý oblysynda sybaılas jemqorlyq deńgeıi tómendegenin habarlaǵan bolatynbyz.
