Jemqorlyqpen kúres agenttigi jańa jyl qarsańynda 35 qaıyrymdylyq aktsııasyn uıymdastyrdy

NUR-SULTAN. QazAqparat - Sybaılas jemqorlyqqa qarsy qyzmet «Іzgilik elshileri» eriktilerimen, jastar máslıhaty depýtattarymen, «Adaldyq alańy» jáne arnaıy monıtorıng toptarynyń belsendilerimen birlesip, jańa jyldyq korporatıvterdiń ornyna eldiń barlyq óńirlerinde jańa jyldyq qaıyrymdylyq aktsııalaryn ótkizdi.

Agenttiktiń baspasóz qyzmeti taratqan málimetterge qaraǵanda, bastamanyń maqsaty – qamqorlyq pen qoldaýǵa muqtaj múmkindigi shekteýli, kópbalaly jáne az qamtylǵan otbasylardyń balalaryn, balalar úıleriniń tárbıelenýshilerin jańa jylmen quttyqtap, qoldaý kórsetý.

Agenttik eriktiler jobasynyń aıasynda eki myńǵa jýyq bala qatysqan 35 qaıyrymdylyq aktsııasyn uıymdastyrdy. Sybaılas jemqorlypen kúres qyzmeti «Tilekter shyrshasyn» uıymdastyryp, onda ilingen 100 balanyń Aıaz ataǵa jazǵan jańa jyldyq tilekterin oryndady.

Máselen, Agenttiktiń Nur-Sultan qalasy boıynsha departamenti «Nurly júrek» ortalyǵynda erekshe qajettilikteri bar 120 balaǵa arnalǵan jańa jyldyq mereke uıymdastyrdy.

Almaty oblysynda múmkindigi shekteýli balalarǵa arnalǵan shyrsha uıymdastyryp, tátti estelik syılyqtar tabystady.

Qyzylorda oblysynda qyzmetkerler jańa jyldyq kıim kıip, «Qamqorlyq» daǵdarys ortalyǵynyń balalaryn quttyqtady. Sonymen qosa, kontserttik baǵdarlamasy bar balalar erteńgiligi uıymdastyrylyp, balalardyń qalaýymen syılyqtar úlestirdi.

Mundaı sharalardy Agenttiktiń barlyq terrıtorııalyq departamentteriniń ujymdary ótkizdi.

Agenttik uıymdastyrǵan «Qaıyrymdylyq aptasy» qazaqstandyqtar arasynda parasattylyq pen meıirimdilikti nasıhattaıdy.