Jemqorlyqpen kúres agenttigi MSM-niń laýazym ıeleriniń ustalýyna qatysty pikir bildirdi

ASTANA. QazAqparat - Memlekettik qyzmet isteri jáne sybaılas jemqorlyqqa qarsy is-qımyl agenttiginiń resmı ókili Janna Bastarova Mádenıet jáne sport mınıstrliginiń laýazymdy qyzmetkerleriniń paramen ustalý jaǵdaıyna qatysty pikir bildirdi, dep habarlaıdy QazAqparat tilshisi.

«Qazirgi ýaqytta sotqa deıingi tergeý amaldary júrgizilip jatyr. QR Qylmystyq kodeksiniń 201-babyna sáıkes, barlyq aqparatty ázirge jarııalaýǵa bolmaıdy», - dedi Janna Bastarova vedomstvoda ótken jıynnan keıin tilshilerdiń suraǵyna jaýap bere otyryp.

Ol sonymen birge, sheneýnikteriniń ustalý jaǵdaıy tirkelgenin rastady.

«Iá ondaı jaǵdaı boldy. Biraq, bul rette sybaılas jemqorlyqqa qarsy ulttyq bıýro mundaı aqparatty taratpaǵanyn esepke alýdy suraımyn. Aıtqanymdaı, ázirge sotqa deıingi tergeý amaldary júrgizilip jatyr. Qosymsha málimetter bolǵan jaǵdaıda biz mindetti túrde Sizderge habarlaıtyn bolamyz», - dedi Janna Bastarova.