Jemqorlyqpen kúres agenttigi «Bolashaqty» teksermek

NUR-SULTAN. QazAqparat - Sybaılas jemqorlyqqa qarsy is-qımyl agenttiginiń ókilderi «Bolashaq» baǵdarlamasy aıasynda bilim alǵandardy qarjylandyrý máselesine qatysty tekserý júrgizedi, dep habarlaıdy QazAqparat tilshisi.

Brıfıng barysynda QR Sybaılas jemqorlyqqa qarsy is-qımyl agenttigi «Bolashaq» halyqaralyq baǵdarlamalar ortalyǵy» AQ-nyń óziniń bastamasy boıynsha júrgizgen Ortalyqtyń qyzmetindegi sybaılas jemqorlyq táýekelderine ótkizilgen syrtqy taldaý qorytyndylaryn jarııalady.

Agenttiktiń Preventsııa departamenti jemqorlyq táýekelderin taldaý basqarmasynyń asa mańyzdy ister jónindegi ofıtseri Aınagúl Karıpovanyń sózine qaraǵanda, taldaý kezinde táýekelderden bólek, ereje buzý oqıǵasy anyqtaldy. Bul rette kemshilikterdiń basym bóligin Bilim jáne ǵylym mınıstrliginiń, sondaı-aq Ortalyqtyń óziniń aýdıtorlyq tekseristeri anyqtady.

«2016 jyldan beri ortalyqtyń qarjylyq eseptiligi eskertýmen bekitilgen. Barlyq syrtqy aýdıtter málimetter shynaıy ári tıisti dárejede kórsetilgeni týraly senimdim dálelderdiń joqtyǵyn atap ótken. Buǵan qarjylandyrylǵan ári oqyp júrgen stıpendıattar sany týraly túrli tsırflar dálel bola alady. Málimetter eki derbes aqparattyq júıelerde saqtalǵan, ıaǵnı «1S-býhgalterııa» men «e-Bolashaqta». Ár jyldary úılespeıtin kórsetkish 68-den 214 adamǵa deıin jetken. Bul óz kezeginde oqýdy tóleýge bólinip, óziniń rastalaýyn tappaǵan bıýdjet qarjysynyń 10 paıyzdan astamy. Atalǵan faktiler boıynsha agenttik tekserý júrgizedi», - Aınagúl Karıpova.

Sonymen qatar ol byltyr atalǵan eki júıeniń ıntegratsııasy qarastyrylǵanyn, satyp alýlar týra shart bekitilgenin atap ótti.

«Bul turǵyda tólem 100 paıyz jasalǵanymen, tıisti sharalar sońyna deıin is júzinde oryndalmaǵan. Integratsııa stıpendıattardy esepke alýdy uıymdastyrý týraly barlyq máseleni sheshýge múmkindik beredi», - derp atap ótti Agenttik ókili.