Jemqorlyqpen kúres agenttigi Áleýmettik kásipkerlik korporatsııalardaǵy bylyqtardy atady

ASTANA. QazAqparat – Áleýmettik kásipkerlik korporatsııalardyń ınvestıtsııalyq jobalarǵa jer ýchaskelerin konkýrstan tys berip kelgen. Bul týraly Májilis depýtattarynyń saýalyna QR Sybaılas jemqorlyqqa qarsy is-qımyl agenttiginiń tóraǵasy Oljas Bektenovtiń jaýabynda aıtylǵan.

«Bıyl 2019-2021 jyldar kezeńinde 17 ÁKK qyzmetindegi sybaılas jemqorlyq táýekelderine syrtqy taldaý júrgizildi. Kóptegen sybaılas jemqorlyq táýekelderi, sondaı-aq ÁKK-niń naqty qyzmetiniń olardy qurý maqsattary men mindetterine sáıkes kelmeýi anyqtaldy. Investıtsııalyq jobalarǵa jer ýchaskelerin konkýrstan tys berý faktileri anyqtaldy. Osylaısha, árbir ekinshi joba kóp páterli turǵyn úıler, meıramhanalar, avtojýý jáne taǵy basqa qurylystar salý bolyp tabylady. Óndiriske salynǵan ınvestıtsııalar jeke sıpatqa ıe. Osylaısha, ÁKK qyzmetiniń negizgi qaǵıdaty – jeke sektormen qamtylmaǵan keńistikte tıimdi jumys isteý jáne onymen básekelespeı-aq bıznestiń damýyn yntalandyrý buzylady», - dedi agenttik tóraǵasy.

Onyń atap ótýinshe, atalǵan faktiler Básekelestikti qorǵaý jáne damytý agenttiginiń, sondaı-aq Ulttyq ekonomıka mınıstrliginiń hattarymen, habarlamalarymen rastalǵan.

«Júrgizilgen jumys barysynda sondaı-aq «Aqtóbe» ÁKK vedomstvolyq baǵynysty ındýstrııalyq aımaqtyń aýmaǵynda krıptovalıýtany óndirý boıynsha kompanııa – «Aktobe Smart Tech» JShS (maınıng fermasy) qyzmetiniń faktisi anyqtaldy. Atap aıtqanda, atalǵan JShS gazdyń edáýir kólemin tutyný arqyly onyń naryǵynda tapshylyq týdyrdy. Nátıjesi óńirdiń turǵyndary men kásipkerlerine gazdandyrýǵa tehnıkalyq sharttar berýden bas tartýǵa alyp keldi», - dedi Oljas Bektenov.