Jemqorlyqpen qoǵam bolyp kúrespeı, ony jeńý múmkin emes - B. Kamalov
ALMATY. QazAqparat- Almatyda «Sybaılas jemqorlyq: shyǵý sebepteri jáne kúresý joldary. Sybaılas jemqorlyqsyz bolashaq» atty ǵylymı-tájirıbelik konferentsııa ótti.
Energetıka jáne baılanys ýnıversıtetindegi jıynǵa atalmysh joǵary oqý ornynyń oqytýshy-professorlar quramy men stýdent jastary, sondaı-aq QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Almaty qalasy boıynsha departamentiniń ókilderi qatysty.
«Jemqorlyqpen qoǵam bolyp kúrespeı, ony jeńý múmkin emes. Bul úshin árbir Qazaqstan azamatynyń boıyna jemqorlyqqa qarsy mádenıet qalyptastyrý qajet. Bul jerde, ásirese óskeleń urpaqpen jumys isteý erekshe mańyzǵa ıe. Óıtkeni, jemqorlyqqa qarsy tálim-tárbıeni adam boıyna bala kezden sińirsek qana bul áleýmettik jaýyzdyqty jeńýge bolady. Sondyqtan, búgingi tańda memlekettik organdar men barlyq oqý oryndarynda jemqorlyqqa qarsy arnaıy kýrstar júrgizilýi tıis», - dedi óziniń alǵy sózinde QR Memlekettik qyzmet isteri jáne sybaılas jemqorlyqqa qarsy is-qımyl agenttigi Almaty q. boıynsha departamenti basshysynyń orynbasary Baqtııar Kamalov.
Sonymen qatar ol, qazir QR Senatynda «Memlekettik qyzmet týraly» jańa zań jobasy qaralyp jatqandyǵyn jáne elimizde memlekettik qyzmetkerlerdiń etıkasyna qatysty jańa Biryńǵaı etıkalyq kodeks ázirlengendigin aıtty.
«Bul kodeks memlekettik qyzmetkerlerdiń qyzmette jáne kúndelikti ómirdegi júris-turystarynyń jańa standartyn bekitedi. Sonyń negizinde aldaǵy ýaqytta memlekettik organdarda etıka boıynsha arnaıy ýákil jumys isteıtin bolady. Ol etıkalyq normalardyń saqtalýyn qadaǵalaıdy. Al onyń qyzmetin úılestirý - sáıkesinshe osy kodeksti ázirlegen QR Memlekettik qyzmet isteri jáne sybaılas jemqorlyqqa qarsy is-qımyl agenttigi men ony óńirlik departamentterine júkteledi, - dedi B. Kamalov.
