Jemqorlyqqa tózbeýdi ómirdiń ádiletti normasyna aınaldyrý biz úshin óte mańyzdy mindet - Q.Qojamjarov
ASTANA. 13 mamyr. QazAqparat /Marlan Jıembaı/ - Elimizde qalyptasqan quqyqtyq sana-sezimdi arttyrý, jemqorlyqqa tózbeýdi ómirdiń ádiletti normasyna aınaldyrý biz úshin óte mańyzdy mindet.
Búgin elordada «Sybaılas jemqorlyqsyz - bolashaqqa!» atty respýblıkalyq aqparattyq-nasıhattyq aktsııanyń bastalýyna oraı ótkizilgen baspasóz máslıhatynda QR Ekonomıkalyq qylmysqa jáne sybaılas jemqorlyqqa qarsy kúres agenttiginiń tóraǵasy Qaırat Qojamjarov osylaı málim etti.
«Elbasynyń tapsyrmasyna oraı jemqorlyqqa qarsy memlekettik saıasattyń eń mańyzdy baǵyty retinde qoǵamdyq ıstıtýttar jáne halyqpen turaqty túrde jumys jasaýǵa baǵyttalady. Sebebi azamattyq qoǵamnyń qatysýynyń úlesi bolmasa, qoıǵan maqsattarǵa jetý múmkin emes», - dedi ol.
Onyń paıymynsha, qazirgi ýaqytta elmizde qalyptasqan quqyqtyq sana-sezimdi arttyrý, jemqorlyqqa tózbeýdi ómirdiń ádiletti normasyna aınaldyrý óte mańyzdy mindet bolyp otyr. Osy oraıda qolǵa alynyp otyrǵan aqparattyq-nasıhattyq aktsııa jańa 2011-2015 jyldarǵa arnalǵan sybaılas jemqorlyqqa qarsy turý baǵdarlamasy aıasynda ótedi. Sonymen qatar shara azamattardyń memlekettik organdarǵa degen senimin arttyrý, olardyq quqyqtyq bilimin kóterý maqsatynda qolǵa alyndy.
«Qazirgi tańda el halqynyń basym bóligi jemqorlyqpen kúreste qoǵam men memlekettiń kúsh biriktirýi qajet degen pikirge kelip otyr dep nyq senimmen aıtýǵa bolady», - dedi agenttik tóraǵasy.
