Jemqorlyqqa qarsy respýblıkalyq shtab jastarmen kezdesti

AQTÓBE. QazAqparat - Aqtóbe oblysyna jumys saparymen kelgen Sybaılas jemqorlyqqa qarsy is-qımyl agenttigi janyndaǵy respýblıkalyq aqparattyq-aǵartýshylyq shtab óńir jastarymen kezdesti, dep habarlaıdy QazAqparat tilshisi.

Sharaǵa jergilikti joǵarǵy oqý oryndary men kolledjderdiń 400-ge jýyq stýdenti qatysty.
Kezdesý barysynda sóz sóılegen shtab tóraıymy Yrza Tursynzada shtabtyń qurylý maqsatyn aıtyp, óskeleń urpaqty parasatty, adal ári ádil bolýǵa, qoǵam arasynda ejelden qalyptasqan qundylyqtardy saqtaýǵa shaqyrdy.

«Agenttik ıgi bastama kóterip, belsendi qoǵam ókilderimen birge sybaılas jemqorlyqqa qarsy aqparattyq-aǵartýshylyq shtab qurdy. Jumys sapary barysynda stýdenttermen kezdesýdiń sáti tústi. Shynymdy aıtsam, aqtóbelik jastarǵa árqashan rıza bolamyn. «Bireýdiń ala jibin attama» degen halqymyz ózgeniń jaılaýyn ruqsatsyz baspaı, parasattylyq pen uıatty barlyǵynan bıik qoıǵan. Adal sózge arsyz ǵana toqtamaıdy. Sizder appaq paraq sekildi ómirdi endi bastaǵaly jatyrsyzdar. Sondyqtan, búgin biz aıtqan sózdi kókeıge túıip, júrekke jetkizesizder degen senimdemin», - dedi Yrza Tursynzada.

Al agenttiktiń resmı ókili Arman Berdalın óz kezeginde, sybaılas jemqorlyqqa qarsy is-qımyldaǵy aldyn-alý sharalarynyń mańyzdylyǵy jóninde baıandap, jastardy ýaqytty durys josparlaýǵa, durys bilim alýǵa, básekege qabiletti maman bolýǵa shaqyrdy.

«Bir mysal aıtaıyn. Eldiń bir túkpirindegi bedeldi aqsaqal turǵyndarǵa arnap emhana salyp, ómir boıy sony ózi basqarǵan. Keıin abyroımen zeınetke shyqty. Bas dáriger laýazymyna óziniń qyzy keledi. Tanys-tamyr, sybaılastyq emes, rasynda da bilimi men eńbegi myqty. Alaıda qyzy aıaǵyn shalys basyp, 150 myń teńge para alyp turǵan jerinde ustalyp qaldy. Ýaıymdap, qaıǵyrǵan anasy tósek tartyp, keıin dúnıe salady. El arasynda erekshe qurmetke ıe ákesi, kórshi-qolańnan uıalyp, kóshege shyǵýdan qalady. Álgi azamatsha 150 myń teńgege óziniń anasyn qaıtaryp ala ala ma? 150 myń teńgege asqar taýdaı ákesiniń bedelin qalpyna keltire ala ma? Oılanbaı jasaǵan bir áreket ómirlik ókinishke aınalyp ketýi múmkin. Paıda oılaǵandar para beredi, arsyzdar aqsha kórse ala beredi. Jastar, baýyrlar, árqashan da adal bolyp, ata-ananyń úmitin aqtaýǵa sizderdi shaqyramyn» - dedi Arman Berdalın.

Jınalǵan jastar shtab múshelerine alǵys aıtyp, ózderin qyzyqtyrǵan suraqtarǵa tıisti jaýap aldy.