Jemqorlyqqa qarsy qyzmette bir adamnyń uzaq otyrǵany durys emes - Jaqsybekov

ASTANA. QazAqparat - QR Memlekettik qyzmet isteri jáne sybaılas jemqorlyqqa qarsy kúres agenttiginiń keńeıtilgen májilisinde Prezıdent Ákimshiliginiń basshysy Ádilbek Jaqsybekov aldymen agenttik qyzmetkerleriniń óz ishinde jemqorlyqqa jol bermeý kerektigin jetkizdi. Sóıtip, atalǵan vedomstvonyń burynǵy ımıdjin ózgertip, xalyqtyń oǵan degen senimin arttyrǵan jón, dep xabarlaıdy QazAqparat.

"Kúni keshe kadr máselesi boıynsha ulttyq komıssııanyń otyrysynda biz Sybaılas jemqorlyqqa qarsy kúres jónindegi ulttyq bıýronyń (agenttiktiń quramyna kiretin qurylym - avt.) aımaqtyq organdarynyń basshylyǵyn bekittik. Shyny kerek, jaqsy kadrlar. Menińshe, olardy tańdaǵanda merıtokratııa negizderi, ıaǵnı adamnyń jeke eńbegi, qabileti men tájirıbesi barynsha eskerildi. Basshylyqqa kásibı adamdar keldi deýge ábden bolady. Endi, kóbisin aýystyrdy, rotatsııa (jańa adamdardy taǵaıyndaý - avt.) boldy. Ol da durys. Sebebi ondaı jerde bir adamǵa uzaq ýaqyt otyra berýge bolmaıdy. Atalǵan qyzmettiń adamdary jumysyn aýystyrýǵa árdaıym daıyn bolýy shart", - deıdi Á.Jaqsybekov.

Osy oraıda Prezıdent Ákimshiliginiń basshysy agenttiktiń qurylý tarıxyna, onyń ataýyn birneshe ret aýystyryp, biraz qurylymdyq ózgeristerdiń bolǵanyn eske aldy. Sol kezde jemqoryqqa qarsy qyzmettiń qatarynda zań buzǵan sheneýnikterdiń istegeni de xalyqtyń esinde. Sonyń saldarynan qazirgi jemqorlyqqa qarsy ulttyq bıýronyń ımıdji buzyldy.

"Endi, jańadan taǵaıyndalǵan basshylyqtyń (aımaqtyq basshylar - avt.) negizgi mindeti - sol ımıdjdi ózgertý. Halyq sizderge senýi tıis", - dep atap kórsetti Prezıdent Ákimshiliginiń basshysy.