Jemqorlyqqa qarsy kúres: Agenttik óz taktıkasyn ózgertti
Sybaılas jemqorlyqqa qarsy saıasat departamentiniń dırektory Danııar Sabyrbaevtyń aıtýynsha, búginde xalyq kóp nárseni jemqorlyq dep qabyldaıdy. Alaıda zań boıynsha keıbir áreketter ondaı sanatqa jatpaıdy. Máselen, bir adam vokzalǵa baryp, bılet taba almasa, ony óz erkimen deldaldardan satyp alady. Artynan «bul - taza jemqorlyq» deıdi. Alaıda zańǵa sáıkes, ol eki adamnyń arasyndaǵy qarym-qatynas qana jáne sybaılas jemqorlyq bolyp sanalmaıdy. Budan bólek, mektep dırektory aqsha jınasa, xalyq ony da jemqorlyqqa jatqyzady.
«Shyn máninde, ol jemqorlyq emes. Biz osyny úsh jyl boıy túsindirip keldik. Biraq eshteńe shyqpady. Sol sebepti óz taktıkamyzdy ózgerttik. Endi, biz zań boıynsha jemqorlyqtyń anyqtamasyna qaramaımyz. Halyq jemqorlyq dese, tekseriske kirisemiz. Qazir kolledjderdi, temirjol vokzaldaryn tekserip jatqanymyz da sodan. Aldaǵy ýaqytta basqa da uıymdarǵa baramyz. Buryn olar bizdi jaqyndatpaı júrse, endigi kezekte olaı bolmaıdy. Biz xalyqtyń «tapsyrysy» boıynsha jumys isteımiz», - dedi D.Sabyrbaev Astanada ótken jıynda.
Onyń aıtýynsha, sybaılas jemqorlyqpen kúres sharalaryna qoǵamnyń ózi - el azamattary atsalyspasa, osy saladaǵy jumystyń nátıjesi bolmaıdy.
«Bári oılaıdy, jemqorlyqty memlekettiń kúshimen ǵana jeńýge bolady. Ózimizdiń agenttik, tergeý qyzmetteri jáne taǵy basqa organdar kúresýi tıis degen pikir bar. Áste olaı emes. Halyq osy jumysqa neǵurlym kóp aralassa, jemqorlyqtyń deńgeıi de soǵurlym tómen bolady. Bizdiń jumysymyz da tıimdi bolady. Halyq jemqorlyqty joıýǵa ózi múddeli bolýy qajet. Ókinishke qaraı, qoǵamnyń myqty ustanymy joq. Máselen, dál qazir bárimiz jemqorlyqqa qarsymyz dep aıtsaq ta, erteń dáriger týǵan-týysymyzǵa jaqsy qarasyn degen nıetpen zańsyz aqsha berýge daıyn turamyz. Demek, sol kezde jemqorlyqqa qatysty ustanymymyz ózgeredi. Sondyqtan eń aldymen jalpy múddeni jeke múddeden joǵary qoıý qajet. Al jeke suraqtardy sheshkende sol jalpy múddeni oılaýymyz jón. Sonda ǵana jemqorlyq salasyndaǵy jaǵdaı, xalyqtyń sanasy ózgeredi. Biz osy máselege negizgi basymdyq berip kelemiz», - dep atap kórsetti D.Sabyrbaev.