Jemqorlyqqa qarsy agenttik poıyz bıleti alypsatarlarymen qalaı kúrespek
ASTANA. QazAqparat - QR Memlekettik qyzmet isteri jáne sybaılas jemqorlyqqa qarsy is-qımyl agenttigi Jemqorlyqtyń aldyn alý basqarmasynyń basshysy Islambek Maıshekın temir jol bıletterin alypsatarlaryna qarsy qandaı sharalar júrgizilip jatqanyn aıtty, dep habarlaıdy QazAqparat tilshisi.
«Agenttik pen «Jolaýshylar tasymaly» AQ arasyndaǵy kelisim aıasynda qurylǵan «Adal jol» jobalyq keńsesi qazirgi ýaqytta temir jol bıletterin alypsatarlardyń áreketin joıýǵa baǵyttalǵan jumystar júrgizip jatyr. Alypsatarlar túrli, onyń ishinde bılet tapshylyǵy oryn alatyn baǵyttarǵa da arnalǵan bıletterdiń bir bóligin aldyn ala satyp alyp, odan keıin ony joǵary baǵa satady degen boljam bar», - dedi ol.
Onyń aıtýynsha, alypsatarlardyń mundaı áreketteri elimizdiń barlyq óńirlerinde arnaıy júrgizilgen tekserý sharalary barysynda anyqtalǵan.
«Tipti brondaý júıesiniń ózi bıletterdi erkin satylymnan shyǵaryp, kóleńkeli satylymǵa shyǵarýǵa múmkinshilik beredi dep esepteımiz»,- dedi agenttik ókili.
Basqarma basshysynyń sózine qaraǵanda, bul máseleni jan-jaqty talqylaý úshin jobalyq top qurylǵan. Atalǵan top bıletterdi alaıaqtyq jolmen satýǵa, adamı faktordyń aralasýyna jol bermeıtin zamanaýı baǵdarlamalyq ónim jasap shyǵarýǵa usynys berýi tıis.
