Jemqorlyqqa qarsy agenttik azamattyq uıym bolýy tıis – Aıdos Sarym
«Keńes zamanynan beri, ásirese kúshtik qurylymdarǵa qansha adamdy túrmege otyrǵyzǵanyna, sottaǵanyna qatysty talap birinshi orynda bolyp keldi. Meniń oıymsha, bul - durys emes. Jemqorlyqpen kúrestiń eń durys joly – jemqorlyq aıasyn taryltý, baǵytyn azaıtý. Shyndap keler bolsaq, Sybaılas jemqorlyqqa qarsy is-qımyl agenttigi áli de bolsa qoǵamda kúshtik qurylym degen pikir bar. Menińshe, jemqorlyqqa qarsy agenttik azamattyq uıym bolýy tıis. Azamattyq uıym bolǵan kezde tergeýshiden góri sarapshylar, memlekettik qyzmettiń, qoǵamdyq, ekonomıkalyq qatynastardyń ózegin, ishki qurylymyn biletin mamandar bolýy qajet. 21-ǵasyr syılaǵan jaqsy jańalyqtardyń biri – tsıfrlandyrý. Kóptegen qyzmettiń barynsha ınternetke ótýi, adam men sheneýniktiń bir-birimen kezdespeýi túptep kelgende jemqorlyqty tejeıdi, azaıtady. Sol sııaqty búgingi kúni isteıtin basty sharýamyz - jemqorlyqpen kúresti jalpy qoǵamda bolyp jatqan dúnıeden ajyratyp qaramaý», - dedi Májilis depýtaty Sybaılas jemqorlyqqa qarsy is-qımyl agenttiginiń baspasóz qyzmeti alańynda ótken brıfıngide.
Sonymen qatar ol Qazaqstan Ortalyq Azııa elderiniń ishinde eń birinshi bolyp aýyl ákimderin saılaýdy ótkizgeli otyrǵanyn atap ótti. Onyń aıtýynsha, bıyl aýyl ákimderi, al úsh jyldan keıin aýdan ákimderi saılanatyn bolady.
«Bul - halyq pen bıliktiń arasyn jaqyndatý, halyqtyń óz bolashaǵyna degen jaýapkershilikti qolyna ustatý. Túptep kelgende - bul óte úlken sharýa. Buryn aýyl ákimderiniń bıýdjeti bolmaıtyn. Qazir tórtinshi bıýdjet engizildi. 1995 jyly qabyldanǵan Konstıtýtsııamyzdyń sońǵy taptarynda Qazaqstanda ózin-ózi basqarý júıesi engiziledi delingen talap bolǵan. Mine, sol 25 jyl ótken soń endi ǵana júzege asyrylmaq. Salyqtardyń biraz túri, ásirese jerge jatysty salyq jergilikti ákimdikke beriledi. ıAǵnı, osy dúnıeler kúshine enip, aýyl ákimi saılanǵannan keıin aýyl halqy da, ákimi de jerdiń durys paıdalanýyna múddeli bolady. Óıtkeni, sol salyqtan túsetin aqshadan jalaqy berilip, aýylǵa qajetti is-sharalar júzege asyrylady», - dedi Aıdos Sarym.
Májilis depýtaty elimiz munaıly ekonomıkadan adamdardyń energııasyna negizdelgen ekonomıkaǵa aıaq basqanyna nazar aýdartty.
«Bul oraıda ádilettilik degen másele kóteriledi. Jemqorlyq máselesin jasalǵan qylmyspen kúres emes, osy reformalardyń ishindegi mańyzdy, úlken alǵysharty dep qaraǵanymyz durys. Sondyqtan eń bastysy ákimdi, mınıstrdi, basqany qolynan ustap alyp, túrmege tyǵý emes. Másele sonyń oblysynda, mınıstrliginde, salasynda jemqorlyqtyń joldary men múmkindikterin azaıtatyn dúnıe jasaýda bolyp otyr», - dedi ol.