Jemqorlyqqa basshylardyń jumysqa nemquraılylyǵy sebep - Dýlat Azbergenov

ASTANA. QazAqparat - Ádette jemqorlyqqa basshylardyń jumysqa nemquraılylyǵy sebep bolyp jatady. Bul pikirdi búgin elorda ákimdiginde ótken jıynda QR Sybaılas jemqorlyqqa qarsy is-qımyl ulttyq bıýrosy Astana qalalyq departamentiniń basshysy Dýlat Azbergenov bildirdi, dep habarlaıdy QazAqparat tilshisi.

«Zań barlyǵyna birdeı jemqorlyqpen kúres júrgizýdi mindetteıdi. Biraq, is júzinde basshylar bul máselelerden jıi tysqary qalyp jatady. Nátıjesinde jemqorlyq jasalady. Tájirıbe kórsetip otyrǵandaı, kóp jaǵdaıda qylmys joǵary laýazymdy tulǵalar tarapynan tolyqtaı baqylaýdyń bolmaýynan nemese bul baǵyttaǵy jumystardyń álsizdiginen oryn alady. Sondyqtan jemqorlyqtyń negizgi sebepterine toqtalǵym keledi. Al onsyz jemqorlyqpen tıimdi kúresý múmkin emes», - dedi departament basshysy.

Onyń aıtýynsha, eń aldymen basshylar jumystarynyń kásibı erekshelikterin jáne ózderiniń mindetterin bile bermeıdi. Osyndaı saýatsyz basshylardyń saldarynan onyń qaramaǵyndaǵy qyzmetkerleri qylmys jasap jatady.

«Ekinshisi - salǵyrttyq, ıaǵnı, óz mindetin nemketti oryndaý. Úshinshisi - bul áreketsizdik. Demek, basshy baǵynyshty qyzmetkeriniń onymen aınalysatyndyǵyn biledi. Biraq, esh shara qabyldamaıdy. Tórtinshi - qylmystyń qatysýshysy bolýy», - dedi ol.

Osy oraıda departament basshysy Saryarqa aýdany ákiminiń orynbasary R.Aqshýrınnge qatysty qozǵalǵan qylmystyq isti mysalǵa keltirip ótti.

«Ol sońǵy úsh jyl boıy 120 mln teńgeden astam bıýdjet qarajatyn ońdy-soldy shashyp kelgen. Buǵan deıin aıtqanymdaı, ol úsh aýdan ákiminiń qol astynda jumys istegen. Birde-bir ákim oǵan laıyqty baqylaý júrgizbegen, aýmaqty tazalaýǵa ketetin qarajattyń qaıda jumsalǵanyn, jumys nelikten oryndalmaǵanyn suramaǵan. Al memleket qarajaty shyǵyndalǵan», - dedi Dýlat Azbergenov