Jemqorlyq jaıly habarlaǵan 8 túrkistandyq 1,5 mln teńge syıaqy aldy

NUR-SULTAN. QazAqparat – Jyl basynan beri Túrkistan oblysynda paraqorlyq árekettiń aldyn alyp, quzyrly mekemege der kezinde habarlaǵan 8 azamatqa 1,5 mln teńge kóleminde yntalandyrý syıaqysy berildi.

Bul týraly QR Sybaılas jemqorlyqqa qarsy is-qımyl agenttiginiń Túrkistan oblysy boıynsha departament basshysy Hákim Kóshqalıev málim etti, dep habarlaıdy QazAqparat tilshisi.

«Túrkistan oblysy respýblıkadaǵy iri oblystardyń biri. Halqynyń sany 2 mln-nan asady. Oblystyń quramyna 3 qala, 14 aýdan kiredi. Jemqorlyqty boldyrmaýda onyń aldyn alý óte mańyzdy. Osy oraıda bıyl jyl basynan beri 870 myńnan astam adamdy qamtyǵan 675 sybaılas jemqorlyqtyń aldyn alý sharasy uıymdastyryldy. Sonymen qatar 264 kezdesý ótkizilip, 333 tikeleı efırden jemqorlyq máselesi talqylandy. Sol sııaqty paraqorlyqtan aýlaq bolýǵa shaqyratyn 9 beınerolık túsirilip, ol halyqqa nasıhattaldy. Halyqpen tyǵyz baılanystyń biri BAQ, osy oraıda «Túrkistan» telearnasynda «Halyq úni» atty telebaǵdarlamasy ashyldy», - dedi Hákim Kóshqalıev Antikor Live jobasynyń tikeleı efırinde.

Onyń aıtýynsha, sybaılas jemqorlyqtyń aldyn alýda óńir azamattary belsendi.

«Bıyl paraqorlyq áreket týraly habarlaǵan 8 tulǵaǵa 1,5 mln teńgeniń syıaqysy berildi. Árıne, biz mundaı qoǵam belsendilerin qoldaımyz. Jalpy jyl sanap Túrkistan oblysynda jemqorlyq áreketine beı-jaı qaramaıtyn belsendi azamattardyń sany artyp keledi. Sonymen qatar bizde Call ortalyq jumys isteıdi, bıyl ortalyqqa 71 adam habarlasty. Belsendi azamattardyń habary men bizdiń mamandardyń jedel áreketiniń negizinde 3 tulǵanyń zańsyz áreketi úshin qylmystyq is qozǵaldy jáne 2 laýazymdy tulǵa jaýapqa tartyldy. Osy oraıda janashyr azamattardyń arqasynda bul baǵyttaǵy jumys óz deńgeıinde atqarylyp jatyr dep oılaımyn», - deıdi ol.

Buǵan deıin atalǵan oblysta qaı salany jemqorlyq jaılaǵany týraly habarlaǵan edik.