Jemqorlyq jasaǵandar memlekettik qyzmettegi «jyly oryndarynan» jyljıtyn emes - Bas prokýratýra
ASTANA. Aqpannyń 4-i. QazAqparat /Aıdar Ospanalıev/ - Sybaılas jemqorlyqpen kúres eldegi árbir memlekettik organ men onyń ókiliniń mindeti. Alaıda prokýrorlyq tekserýler jekelegen basshylardyń bul jumysty talapqa saı júrgizbeı otyrǵanymen qoımaı, jemqorlyqpen kúres zańdarynyń talaptaryn tipti elemeıtindigin anyqtady.
Bul týraly búgin jýrnalıstermen bolǵan brıfıngte Bas prokýratýranyń resmı ókili Nurdáýlet Súıindikov málim etti, dep habarlaıdy QazAqparat.
Onyń aıtýynsha, Aqtóbe oblysynyń Qobda aýdanynda Ámirǵalıev atty azamat 2008 jyly jemqorlyq áreketimen baılanysty qylmysqa jol bergeni úshin sottalǵandyǵyna qaramastan, prokýratýra ókilderi aralasqanǵa deıin aýdandyq Dene shynyqtyrý jáne sport komıtetin basqaryp otyra bergen. Osy tektes oqıǵa Mańǵystaý oblysynyń Mańǵystaý aýdanynda da oryn aldy. Onda óz qyzmetine salǵyrt qaraǵany úshin sottalǵan Qaıymova prokýrorlyq akti engizilgenge deıin Eńbekpen qamtý jáne áleýmettik baǵdarlamalar bólimin basqaryp kelgen. «Ókinishtisi, mundaı faktiler elimizdiń aımaqtarynda kóptep kezdesedi. Olardyń birinde qylmys jasaǵan azamattar memlekettik qyzmetten bosatylmaǵan bolsa, endi bireýleriniń tipti qyzmeti ósken. Atalmysh faktiler elimizdiń Aqtóbe, Qaraǵandy, Qyzylorda, Soltústik Qazaqstan oblystary men Almaty sııaqty qalalarynda oryn aldy», dedi resmı ókil.
