Jemqorlyq úshin jaýapqa tartylǵandardyń basym bóligi - Іshki ister qyzmetkerleri

NUR-SULTAN. QazAqparat - 2020 jyldyń 1-toqsanynda sybaılas jemqorlyǵy úshin 417 laýazymdy tulǵa jaýapqa tartyldy. Bul týraly QR Sybaılas jemqorlyqqa qarsy is-qımyl agenttigi Strategııa jáne jedel basqarý departamentiniń basshysy Nurlan Jaqsymbetov aıtty, dep habarlaıdy QazAqparat tilshisi.

«Agenttiktiń shyǵyndy qalpyna keltirý jumystaryn da erekshe atap ótken oryndy. 1-toqsannyń qorytyndysynda biz anyqtalǵan shyǵynnyń 97 paıyzyn nemese 21,7 mlrd teńgeni ótettik. Bul ótken jyldyń kórsetkishinen 7 ese kóp», - dedi Nurlan Jaqsymbetov.

Onyń atap ótýinshe, jemqorlyq úshin jazaǵa tartylǵan tulǵalar sany 9 paıyzǵa artty. Olardyń árbir tórtinshisi memlekettik organdardyń jáne kvazımemlekettik uıymdardyń birinshi basshylary bolyp otyr.

«Tolyqtaı alǵanda, qylmystyq jaýapkershilikke 417 tulǵa, onyń ishinde respýblıkalyq deńgeıdegi - 11, oblystyq deńgeıdegi -37, qalalyq jáne aýdandyq deńgeıdegi 35 basshy tartyldy», - dedi departament basshysy.

Nurlan Jaqsymbetovtiń dereginshe, ortalyq memlekettik organdar arasynda jemqorlyq qylmysy úshin jazaǵa tartylǵandardyń 57 paıyzy - Іshki ister mınıstrliginiń qyzmetkerleri. Munan bólek, Ekologııa, Aýyl sharýashylyǵy, Qarjy, Indýstrııa mınıstrlikteriniń de birneshe qyzmetkeri jemqorlyq qylmysy úshin ustalǵan. Al jergilikti atqarýshy organdar arasynda osy jyldyń 1-toqsanynda ShQO, Jambyl, Qyzylorda, Túrkistan, Qostanaı jáne Pavlodar oblystary ákimdikterinde jemqorlar kóp ustalǵany belgili bolyp otyr.